9, మే 2012, బుధవారం

సమస్యాపూరణం - 699 (కోయవాఁడు గొట్టె)

కవిమిత్రులారా,

ఈరోజు పూరించవలససిన సమస్య ఇది...

కోయవాఁడు గొట్టెఁ గుపితుఁ డగుచు.

ఈ సమస్యను సూచించిన
గోలి హనుమచ్ఛాస్త్రి గారికి
ధన్యవాదాలు.

9 కామెంట్‌లు:

  1. తోట లోన జేరి తుంటరి బాలుండు
    చెట్టునెక్కి మిగుల దిట్టయగుచు
    కాచు(పు)వాని యునికి గాంచక పండ్లను
    కోయ, వాడు గొట్టె కుపితుడగుచు.

    రిప్లయితొలగించండి
  2. నెత్తిమీద నాల్గు నెమలీకలను గట్టి
    ఆకు లలదియున్న కోకఁ జుట్టి
    తిరుగువాని బాలు రరయుచు నవ్వంగ
    కోయవాడు గొట్టెఁ గుపితుడగుచు.

    రిప్లయితొలగించండి
  3. కిరాతార్జునీయం భూమికగా...
    సవ్యసాచివేటు సవ్యత ప్రశ్నించ
    కోయఁగాని బ్రతుకుకోయుశూళి
    పడినమృగముగూర్చిపట్టువీడనిపార్థు
    కోయవాడుగొట్టె కుపితుడగుచు

    రిప్లయితొలగించండి
  4. పంది నాదనుచును పందెముతో పోరె
    నరుడు కోయరూప హరుడు నాడు
    అర్జునుండు కొట్ట నావేశమున మాయ
    కోయవాఁడు గొట్టెఁ గుపితుఁ డగుచు.

    రిప్లయితొలగించండి
  5. రాము తోట లోని రామ ఫలములను
    కోయ , వాడు గొట్టె గుపితు డగుచు
    అడుగ కుండ కోయ నవసర మేమొ చ్చె?
    రంగ ! యిటుల జేసి దొంగ కాకు .

    రిప్లయితొలగించండి
  6. భారతీయులెపుడు పతకమ్మునొకటైన
    గెలువలేదని విని క్రీడలందు,
    దేశకీర్తి కొఱకు దీక్షబూని మదిని
    కోయవాఁడు గొట్టెఁ గుపితుఁ డగుచు.

    రిప్లయితొలగించండి
  7. మల్లె తోట లోన మెల్లగా జొరబడి
    పూలు కోయ నెంచి పూజ కొఱకు
    తోట మాలి కసిరె మాటమాత్ర మనక
    కోయ వాడు గొట్టె కుపితు డగుచు
    --------------------------------------------
    కోయ దొరలు మేము చెయిజూసి చెబుతాము
    వేయి జన్మ లైన వెలుగు యశము
    వంక లేక వినుము శంకించ పనిలేదు
    కోయ వాడు గొట్టె కుపితు డగుచు !

    రిప్లయితొలగించండి
  8. వైవిధ్యంగా, ప్రశంసనీయంగా పూరణలు చేసిన కవిమిత్రులు...
    సత్యనారాయణ మూర్తి గారికి,
    సహదేవుడు గారికి,
    గోలి హనుమచ్ఛాస్త్రి గారికి,
    సుబ్బారావు గారికి,
    ఊకదంపుడు గారికి,
    రాజేశ్వరి అక్కయ్యకు,
    ................. అభినందనలు, ధన్యవాదాలు.

    రిప్లయితొలగించండి