కవిమిత్రులారా,
ఈరోజు పూరించవలసిన సమస్య ఇది..
మతము మారని జనులకు హితము లేదు.
ఈ సమస్యను సూచించిన కందుల వరప్రసాద్ గారికి ధన్యవాదాలు.
7, మే 2016, శనివారం
6, మే 2016, శుక్రవారం
ఖండకావ్యము - 19
విఘ్నేశ్వర స్తుతి
రచన : గురుమూర్తి ఆచారి
శ్రీకర! సత్కరుణా మధు
శీకర సేచక! సురగణ శేఖర వినుతా!
లోకాధిప! గణనాయక!
ప్రాకట మగు భక్తితోడ భావి౦తు మదిన్
కుడుములను వడల నిడగనె
యిడుముల గిరి పొడుము జేసి యెడపక దయతో
పొడగను నొడయడు గణపతి,
పుడమి విడిది నిడెను నడుము ముదముగ కొలువన్
అరయ నిఖిలవిద్యల కాదిపురుషు డగుచు
నెలుక వాహన మెక్కి తా నెలమి మీర
న౦చితమ్ముగ జగతి పాలి౦చు నట్టి
విఘ్ననాధుని మదిలోన వినుతి జేతు.
ద౦డము ద౦డమయ్య విహిత ప్రతిబ౦ధక జాల శోషణా!
ద౦డము ద౦డమయ్య వినుత స్ఫుట సౌమ్య కళా విభూషణా!
ద౦డము ద౦డమయ్య జనిత శ్రమ పాపతమోనివారణా!
ద౦డము ద౦డమయ్య నిరత౦బు దయ౦గను విఘ్ననాయకా!
"ము౦ దల విఘ్ననాయకుడు పూజితు డౌ " నని డె౦దమ౦దు మే
ము౦ దలపోయుచు౦టిమి; విభుత్వ మహోజ్జ్వల మూర్తి! శాశ్వతా
న౦ద మయ స్వరూప! సుగుణప్రియ! దీనశరణ్య! పార్వతీ
న౦దన! చల్లనైన కరుణన్ వెద జల్లుము విఘ్ననాయకా!
అనయముల బాపు దొరవని
వినయముతో గొలుచు చు౦టి విఘ్నాద్రి పవీ!
అనునయ మారగ తావక
తనయుని మొరలాలకి౦చి దయజూడుమయా
భావమున౦ బ్రియ౦ బలర బ్రత్యహమున్ భవదీయ లోక స౦
భావిత దివ్య భవ్య పద పద్మయుగమ్మును గొల్చు సేవకున్
భావితు జేయ నీ కగును బావ్యము; కాన కృపాధనమ్ము స౦
భావనగా నొస౦గి పరిపాలన జేయవె విఘ్ననాయకా!
సమస్య - 2025 (బెండు మునుఁగు...)
కవిమిత్రులారా,
ఈరోజు పూరించవలసిన సమస్య ఇది..
బెండు మునుఁగు నినుపగుండు దేలు.
5, మే 2016, గురువారం
ఖండకావ్యము - 18
నవగ్రహ స్తోత్రము
రచన : పోచిరాజు కామేశ్వర రావు
శ్రీకర దినకర సోముల
నాకుజ బుధ గురువు శుక్రు డాదిగ శనియున్
రాకేందు రిపులు రాహువు
నా కేతువులన్ స్మరింతు నమితప్రీతిన్ (1)
ఘన తిమి రారిన్ కశ్యప
తనయున్ దురితౌఘహర్తఁ దలతుం భక్తిన్
దినకరు జపాసుమ సమున్
జననోద్దీపిత ప్రచండ సమ్యక్కిరణున్ (2)
విమలాంబుజ హిమ వర్ణున్
హిమ గిరిజాధీశ మౌళి హృత్ప్రియ వాసుం
గమలానుజున్ శశాంకున్
నమస్కరింతును నిశాధి నాధున్ సోమున్ (3)
అశనిద్యుతి సమ భాసితు
ని శక్తిహస్త విభవు ధరణీ సంజాతున్
విశ దాంగారక నామున్
భృశ మంగళకరు నుతింతు పేరిమి తోడన్ (4)
గమ్యా ప్రమేయ రూపున్
రమ్య ప్రియంగు నవ కుట్మల సమశ్యామున్
సమ్యక్సత్వ గుణ నిధిన్
సౌమ్యగ్రహ బుధు నుతింతు సమ్మోదముగన్ (5)
అమర ముని వరాచార్యున్
విమలాత్ముం గాంచన నిభ విలసిత దేహున్
సముచిత రీతి బృహస్పతి
నమస్కరింతు నిల భక్తి ననవర తమ్మున్ (6)
సకలాసుర వర గురువుఁ గ
నక సన్నిభ నవ్య కుంద నాళాభాంగుం
బ్రకటిత శాస్త్రాచార్యుని
నకలంకు నుతింతు శుక్రు నగ్ని ముఖు నిలన్ (7)
యామున సమాన దేహ
శ్యామున్ ధర్మాగ్రజు రవి సంజాతున్ ఛా
యామార్తాండ సుపుత్రున్
వేమారు నుతింతు శనిని విలసిత గాత్రున్ (8)
అతి వీరు నర్ధ కాయుని
సతి సింహిక ముద్దుపట్టిఁ జంద్రా దిత్యా
మిత దళితాసక్త మతిన్
సతతము రాహువు నుతింతు సద్భక్తి నిలన్ (9)
కుసుమామల దళ సన్నిభు
నసదృశ రౌద్రాత్ము ఘోరు నతులిత రౌద్రున్
లసితగ్రహ తారా విభు
వసుధం గేతువు నుతింతు బరమప్రీతిన్ (10)
సమస్య - 2024 (అక్కను ప్రేమించి పెండ్లి...)
కవిమిత్రులారా,
ఈరోజు పూరించవలసిన సమస్య ఇది..
అక్కను ప్రేమించి పెండ్లియాడె ముదమునన్.
4, మే 2016, బుధవారం
ఖండకావ్యము - 17
స్వర్ణ భూమి
రచన : శిష్ట్లా వి.ఎల్.ఎన్. శర్మ
రంగతితో గమింప జనులన్ దనియించెడి విశ్వభావనల్
సంగమమై వసింపగను శాశ్వత కీర్తి సమున్నతిన్ సదా
బంగరు దేశమై బరగు భారతభూమి కివే నమస్కృతుల్!
భాస్వంతంబయి యుద్యమించి కలలన్ బండించి ప్రేమామృతం
బాస్వాదంచెడి జిత్తముల్వొలయు నాహ్లాదంపు హేలాగతుల్
నీ స్వాంతంబున నిల్పుచున్నిరతము న్నెయ్యంబుతో, శాంతితో
నీ స్వాతంత్ర్య మహాద్యుతిన్ వెలుగ నిమ్మీ ధాత్రిపై నెప్పుడున్!
పాటవమందినట్టి పలు భాషల కోమల రాగమాలికల్,
బాటలయందు జీవనము భాసిలజేసెడి సంస్కృతుల్, మదిన్
మేటి సుధీవిధేయత సమీరణ జేసెడి సౌమ్య శక్తి, ము
ప్పేటల దివ్యభావనల, బేనియొసంగుమ! మానవాళికై!
ఇంత విశాల భావఝరు లిచ్చట నిల్పిన దివ్య ధాత్రి, యా
సాంతము ధర్మ సూత్ర పథసారము, సర్వ మతాల సంగమం
బంతర శక్తిగా బరగ, నాదరభావ విశిష్ట యోచనల్
స్వాంతము నందు గూడినవి, భారత దేశ విభాత రాగమై!
నిద్దుర రాని రేయినిట నీదు ధరిత్రి వికాసయోజనల్
పెద్దగజేయ బూనుమిక వేరువిధంబులనేల యోచనల్
హద్దులు దాటుచున్ పెనగు హైన్యమునిండిన స్వార్ధచింతనల్
వద్దిక ప్రొద్దుబుచ్చకుమ వర్ధిలజేయుము భారతావనిన్!
సమస్య - 2023 (ధాన్యముఁ గని రైతు...)
కవిమిత్రులారా,
ఈరోజు పూరించవలసిన సమస్య ఇది..
ధాన్యముఁ గని రైతు తల్లడిల్లె.
దీనికి సబ్స్క్రయిబ్ చేయి:
పోస్ట్లు (Atom)