ఉ:వాడకు నొక్క దేవళము,భారత మంతట పుణ్యతీర్థముల్, వేడుకొనంగ దేవతలు పెక్కురు నుండగ వీడి యన్నిటిన్ నేడొక పర్వమంచచట నిల్చి జనమ్ములు చచ్చుచుండగా వేడుకొనంగ నిష్ఫలము వేంకటనాథుని భక్తితో జనుల్” ( దేశం లో అనేక పుణ్య్క్షేత్రా లుంటే వదిలేసి జనం మొత్తం తిరుపతి మీద పడటం,పైగా అదేదో మంచి రోజని లక్షల మంది పోగవటం ,జనం తోసుకు చస్తుంటే వెంకటేశ్వరుణ్ని ప్రార్థించి ఏమి ఫలం?)
47 కామెంట్లు:
వాడుక రీతిగ భార్యను
వేడిన నిష్ఫలము గాదె ; వేంకటపతినిన్
నేడే కయిముకుళించుచు
తోడుగ నుండమని కోర తులుచన జరుగున్
కందం
ఆడి గెలిచె రాముడు మును
గూడుచు సఖ్యంపు భక్తి గోవిందునితో!
బేడీలొసంగునవి కుతి
వేడిన నిష్ఫలము గాదె వేంకటపతినిన్!!
ఉత్పలమాల
ఆడెను భక్తితోడ సఖుడై హరి తోడనె హాథిరాముఁడున్
గూడెను జూదమున్ గెలిచి గొప్పనగల్ తుది నమ్మ సర్వులున్
బేడిజమెంచి సంకెలల వేదన జెందెడు రీతి సంపదల్
వేడుకొనంగ నిష్ఫలము వేంకటనాథుని భక్తితో జనుల్!
మూఢుండేపని చేయక
మేడలు మిద్దెలను గోరి మిత్రులతోడన్
వేడుకగా భజియించుచు
వేడిన నిష్ఫలము గాదె వేంకటపతినిన్.
వీడుచు ధర్మమార్గమును విత్తము పొందుటె ముఖ్యకృత్యమై
తోడు చరించువారి సిరి దోచుకు దాచెడి స్వార్థచిత్తులే
వీడును కల్మషమ్ములని పెద్దలు చెప్పిరటంచు నిత్యమున్
వేడుకొనంగ నిష్ఫలము వేంకటనాథుని భక్తితో జనుల్.
కీడొనరించెడు వారిని
వేడిన నిష్ఫలము గాదె; వేంకటపతినిన్
వేడిన వారికి కోరిక
లీడేరు రయమున స్వామి లీలామహిమన్
వేడికొనంగ మేలనుచు విజ్ఞతతో తగ నిర్ణయించినన్
గీడొనరించు వారలను కీచకులన్ నెరనమ్మి రక్షకై
వేడుకొనంగ నిష్ఫలము; వేంకటనాథుని భక్తితో జనుల్
వేడిన జెచ్చెరన్ దొలగు వేదన యంచువచింత్రు భక్తులే
పాడక కీర్తనలు సతము
నాడుచు జూదము సలుపు దు రాచార ము లా
మూడు డు భక్తి వి హీ నుడు
వేడిన ని ష్పలము గాదె వేంక ట పతి నిన్
ఊడిగములు వొనరించక
వీడుచు మాతా పితలను పీల్చుకు తినుచున్
పాడుచు కీర్తన లెపుడును
వేడిన నిష్ఫలము గాదెవేంకటపతినిన్
వీడక పదయుగళమ్మును
గూడిన సుజనుల సగోష్టి కోర్కెల దీర్చున్
కీడొనరింపఁగ పరులకు
వేడిన నిష్ఫలము గాదె వేంకటపతినిన్
నేడున మనుజుల పైనను
దాడులు జేయుచు ప్రభువులు ధర్మము తప్పిన్
కీడును దలచచు నెపుడును
వేడిన నిష్ఫలము గాదె వేంకటపతినిన్
వీడక పాదపద్మముల బేరిమి భక్తజనాళి సంగతిన్
గూడి భజింప శ్రీహరిని గోర్కెల దీరుచు నిశ్చయమ్ముగా
కీడొనరింపగాపరుల క్షీణము గోరుచు నల్పబుద్ధితో
వేడుకొనంగ నిష్ఫలము వేంకటనాథుని భక్తితో జనుల్
కం:చూడర బాబూ నీ వొక
నాడును పుస్తకము బట్టి నావె పరీక్షల్
నే డారంభ మ్మౌనని
వేడిన నిష్ఫలము గాదె వేంకటపతినిన్”
మాడలు దోచుచు నెపుడును
మేడలు మిద్దెలు గడించి మేధని దలచిన్
చూడరు స్వామియు యనుకొని
వేడిన నిష్ఫలము గాదె వేంకటపతినిన్
ఉ:వాడకు నొక్క దేవళము,భారత మంతట పుణ్యతీర్థముల్,
వేడుకొనంగ దేవతలు పెక్కురు నుండగ వీడి యన్నిటిన్
నేడొక పర్వమంచచట నిల్చి జనమ్ములు చచ్చుచుండగా
వేడుకొనంగ నిష్ఫలము వేంకటనాథుని భక్తితో జనుల్”
( దేశం లో అనేక పుణ్య్క్షేత్రా లుంటే వదిలేసి జనం మొత్తం తిరుపతి మీద పడటం,పైగా అదేదో మంచి రోజని లక్షల మంది పోగవటం ,జనం తోసుకు చస్తుంటే వెంకటేశ్వరుణ్ని ప్రార్థించి ఏమి ఫలం?)
కం॥ ఆడిన మాటలఁ దప్పుచు
వీడుచు ధర్మ పథమునటు విరివిగఁ జేయన్
వీడకఁ బాప కరుమములు
వేడిన నిష్ఫలము గాదె వేంకటపతినిన్
ఉ॥ ఆడిన మాటఁ దప్పి ధరహాసము మోమున నిల్పి కూళలై
వాడుక కాఁగ చేయుటయుఁ బాపపు చింతన దుష్టకృత్యముల్
వీడక నిత్యమావిధినిఁ బ్రీతిగఁ జేయఁగఁ జేరి కోరుచున్
వేడుకొనంగ నిష్ఫలము వేంకటనాథుని భక్తితో జనుల్
మరొక పూరణండి సంవత్సరాంతములో మాత్రమే పరీక్షలున్న మాసమయంలో అతి సాధారణమండి
ఉ॥ ఆడుచు పాడుచున్ గడిపి యధ్యయనమ్మును జేయకుండఁగన్
వీడుచు వర్షమంతయును విద్యల యూసుఁ బరీక్షలన్నచో
వీడకఁ బట్టు నేర్వఁగను బ్రీతిగ యత్నముఁ జేయు వారలై
వేడుకొనంగ నిష్ఫలము వేంకటనాథుని భక్తితో జనుల్
(3)కం:"వీడు సవతి దెచ్చెను కా
పాడు" మనుచు రామచంద్రు బ్రార్థించ వలెన్
వీడును నిద్దరి పతి కద!
వేడిన నిష్ఫలము గాదె వేంకటపతినిన్”
(మొగుడు రెండో పెళ్లాన్ని తెచ్చాడని బాధ పడితే ఆ బాధ రాముడికి చెప్పుకోవాలి కానీ ఇద్దరు పెళ్లా లున్న వేంకటేశ్వర స్వామికి చెప్పుకుంటే ఏమి లాభం?)
కందం
కాడిని కోర్కెల మోయుచు
వీడక సుఖసౌఖ్యములను వెట్టిగ మునకల్
మూడు మునిగి పుష్కరిణిని
వేడిన నిష్ఫలము కాదె వేంకటపతినిన్
త్రాడును లేని బొంగరము త్రాతను నమ్మని జీవనమ్మిలన్
వేడుక తోడ సాగ మరి వేడరు నమ్మరు దైవ శక్తినిన్
కూడియు రాని రోజులను కూరిమి వేడగ తప్పు కాదకో
వేడుకొనంగ నిష్ఫలము వేంకటనాథుని భక్తితో జనుల్!
రాడని యండ్రు వేడకను, రాదగు శ్రీహరి లేడు రాడనిన్
వీడని భక్తి గాంచమిల, వీధుల తోడుత దిర్గు దైవమున్
కూడిన సంపదల్ కొసరి కూర్చును సంచిత ప్రోవు కర్మలన్
వేడుకొనంగ నిష్ఫలము వేంకటనాథుని భక్తితో జనుల్!
కీడులు తొలంగ భక్తిని
వేఁడిన నిష్ఫలము గాదు వేంకటపతినిన్
మాడ లొసఁగి దుష్ట మతిని
వేఁడిన నిష్ఫలము గాదె వేంకటపతినిన్
గోడుల నాలకించు దయ ఘోర తరాఘ చయమ్ముఁ బాపుఁ జే
తోడుగ నుండు నిత్యమును దొడ్డ వరమ్ము లొసంగుచుండుఁ గా
పాడెడు ఱేఁడు త్రాత యగుఁ బన్నుగఁ గా దిల నెన్నఁ డేనియున్
వేఁడుకొనంగ నిష్ఫలము వేంకటనాథుని భక్తితో జనుల్
మీ పూరణ బాగున్నది. అభినందనలు.
మీ పూరణలు ప్రశస్తంగా ఉన్నవి. అభినందనలు.
మీ పూరణలు ప్రశస్తంగా ఉన్నవి. అభినందనలు.
మీ పూరణలు ప్రశస్తంగా ఉన్నవి. అభినందనలు.
మీ పూరణ బాగున్నది. అభినందనలు.
మీ పూరణ బాగున్నది. అభినందనలు.
'ఊడిగముల నొనరించక' అనండి.
మీ పూరణ బాగున్నది. అభినందనలు.
మీ పూరణ బాగున్నది. అభినందనలు.
'నేడును.. దర్మము దప్పన్... దలచుచు..' అనండి.
మీ పూరణ ప్రశస్తంగా ఉన్నది. అభినందనలు.
మీ పూరణ బాగున్నది. అభినందనలు.
మీ పూరణ బాగున్నది. అభినందనలు.
'స్వామియు ననుకొని'
మీ పూరణ ప్రశస్తంగా ఉన్నది. అభినందనలు.
మీ పూరణలు ప్రశస్తంగా ఉన్నవి. అభినందనలు.
మీ పూరణ బాగున్నది. అభినందనలు.
మీ పూరణ బాగున్నది. అభినందనలు.
మీ పూరణ ప్రశస్తంగా ఉన్నది. అభినందనలు.
మీ పూరణ బాగున్నది. అభినందనలు.
'అనిన్' అన్న ప్రయోగం సాధువు కాదు.
మీ పూరణలు అద్భుతంగా ఉన్నవి. అభినందనలు.
...జేదోడు.. అని ఉండాలనుకుంటాను.
చేయి
వేడుక, తలిదండ్రినెపుడు
జూడక, సంతతిని సతిని, జూడక సతమున్
గాడిదవలె తిరుగు నరుడు
వేడిన నిష్ఫలము గాదె వేంకటపతినిన్
ధన్యవాదాలు గురూజీ 🙏
కూడును బెట్టక యెప్పుడు
నూడిగమున్బొందుచుండి యొక్కని నైనన్
వీడక సాయముఁజేయమి
వేడిన నిష్ఫలము గాదె వేంకటపతినిన్
వేడుక యంచు నెల్లరును వీడక మద్యము నెల్లవేళలన్
బాడుచు నాడుచున్ గొనఁగ భ్రాతలు భార్యయు నడ్డువెట్టగా
వీడగ మత్తునాక్షణమ భీత మనంబున నార్తితోడ వే
వేడుకొనంగ నిష్ఫలము వేంకటనాథుని భక్తితో జనుల్”
పిన్నక నాగేశ్వరరావు.
హైదరాబాద్.
ఆడిన మాటలు తప్పుచు
వీడుచు నీతినియమముల,వేడుక కొఱకై
పాడుచు పాటలు వరములు
వేడిన నిష్ఫలము గాదె వేంకట పతినిన్.
కూడుచు ఖలులను సతతము
దాడులు చేయుచుసుజనులదండించుచుతా
పాడుచు పాటలు విడువక
*"వేడిన నిష్ఫలము గాదె వేంకటపతినిన్”*
వీడుచు న్యాయమార్గమును వేడుచు లంచము నెల్లవేళలన్
కీడొనరించనెంచుచునుగేలినిచేయుచుసాగువాడిలన్
నాడినమాట తప్పుచును నంతయు దోచగ సిద్ధమౌచుతా
*వేడుకొనంగనిష్ఫలమువేంకటనాథుని భక్తి తో జనుల్*
https://kandishankaraiah.blogspot.com/2025/01/5008.html?lr=1737446211730&m=1
కామెంట్ను పోస్ట్ చేయండి