30, జులై 2019, మంగళవారం

సమస్య - 3090 (శవమ లేచి...)

కవిమిత్రులారా,
ఈరోజు పూరింపవలసిన సమస్య ఇది...
"శవమ లేచి రమ్ము సంతసమున"
(లేదా...)
"శవమా సంతస మొప్ప రమ్ము వడిగన్ శశ్వద్యశశ్శాలివై"

76 కామెంట్‌లు:

  1. ప్రాతః కాలపు సరదా పూరణ:

    లవలేశమ్మును శాంతిలేదు కదరా లాభమ్ము రవ్వంతయున్
    భవబంధమ్ములు త్రెంచలేనిది గదా
    ప్రారబ్ధ కర్మంబునున్
    కవిగా మారుచు తాపమొందితినహో కంగారు పుట్టంగ శై
    శవమా సంతస మొప్ప రమ్ము వడిగన్ శశ్వద్యశశ్శాలివై!

    రిప్లయితొలగించండి
  2. దినము లెన్నొ గడిచె దీనత్వ మందున
    కనులు మోడ్చి నిదుర కదలి రాక
    దార సుతులు తలచి తల్లడిల్లు చుండ
    శవమ లేచి రమ్ము సంత సమున

    రిప్లయితొలగించండి
    రిప్లయిలు
    1. అక్కయ్యా,
      పద్యం బాగుంది. కాని కొద్దిగా అన్వయలోపం ఉన్నట్టుంది. శవాన్నే రమ్మని పిలుస్తున్నారా?

      తొలగించండి
  3. మైలవరపు వారి పూరణ

    అర్జునుని అభ్యర్థన..

    శివమౌ స్యందనమందు నీవు నిలువన్ , చెండాడెదన్ వైరులన్.,
    స్తవమున్ జేయుచు కోరుచుంటి నిగమజ్ఞానస్వరూపా ! హరీ.!
    నవనీలాంబుదదేహకాంతివిలసన్నారాయణా.! శౌరి.! కే....
    శవ.! మా సంతస మొప్ప రమ్ము వడిగన్ శశ్వద్యశశ్శాలివై.!

    మైలవరపు మురళీకృష్ణ వెంకటగిరి

    రిప్లయితొలగించండి
  4. గలగలమని దినము నంత గడపి నాము|
    అత్రి వరదుని దర్శన మందినాము|
    కనుల ముందు నేల కొరగి కరగి నావు|
    "శవమ లేచి రమ్ము సంతసమున"
    (ప్రముఖ రచయిత్రి k.b. Lakshmi గారు, నిన్న రాత్రి దివ్యలోకాల కెళ్లి పోయారు. అందరం, కలిసి అత్రి వరద రాజ స్వామి దర్శనం చేసుకున్నాం. తిరిగి వస్తుంటే, ట్రైన్ లో మా కళ్ళముందే )

    రిప్లయితొలగించండి
    రిప్లయిలు
    1. కుసుమ గారూ,
      ఈ విషాదవార్త నాకు ఇంతకుముందే తెలిసింది. ఆమెకు పుణ్యలోకప్రాప్తికై భగవంతుని ప్రార్థిస్తున్నాను.
      మీ పద్యం బాగుంది. మొదటి, మూడవ పాదాలలో యతి తప్పింది. రెండవ, మూడవ పాదాలలో గణదోషం. మీ పద్యానికి నా సవరణ.....

      గలగలమని దినము గడిపినామంతట
      అత్రి వరదుని కృప నందినాము
      కనుల ముందె యొరిగి కరిగినా వయ్యయో
      శవమ! లేచి రమ్ము సంతసమున.

      తొలగించండి
  5. ఐంద్రజాలికుడట ననుచరుని వధించి
    పైన గుడ్డ కప్పె ప్రజల ముందె
    శవమ లేచి రమ్ము సంత సమున యంచు
    వాసిగాను పిలవ వాడు లేచె.

    రిప్లయితొలగించండి
  6. అవనిన్ దుర్జనదుష్కృతప్రకటదుర్వ్యాపార మేపార నే
    నవతారమ్ము ధరింతు నంచు భగవన్! వ్యాక్రుచ్చి రావేలనో?
    వ్యవధానంబిక చేయబోకు ఖలనిర్యాణమ్ముఁ జేకూర్చ, కే
    శవ! మా సంతస మొప్ప రమ్ము వడిగన్ శశ్వద్యశశ్శాలివై.

    రిప్లయితొలగించండి
    రిప్లయిలు
    1. రామాచార్య గారూ,
      మీ పూరణ మనోహరంగా, అద్భుతంగా ఉన్నది. అభినందనలు.

      తొలగించండి
  7. 'శివము' వాని మిత్రు డవతలి గదిలోన
    చేరి నిద్రనుండ జీరదలచి
    పలికె నిట్టు లొకడు పలుకులు తడబడ
    'శవమ' లేచి రమ్ము సంతసమున.

    రిప్లయితొలగించండి
  8. శ్రీ గురుభ్యోన్నమః🙏

    తెలుగు పద్యమందు తీయదనమదేమొ
    తెలుగు వెలుగు నందు దెలిసె నాకు
    కంది వారి ప్రశ్న ఘనముగా మెరవఁ నా
    శవమ లేచి రమ్ము సంతసమున!

    రిప్లయితొలగించండి
    రిప్లయిలు
    1. యజ్ఞేశ్ గారూ,
      మీ పూరణ బాగున్నది. అభినందనలు.
      'మెరవ' తరువాత ఖండబిందువు అవసరం లేదు.

      తొలగించండి
  9. జననమరణమనెడుచక్రములోఁజిక్కి
    మరలమరలజననమందినావు
    నేడుకలిగెముక్తి నీకిక, కాటికి
    శవమ లేచి రమ్ము సంతసమున

    రిప్లయితొలగించండి


  10. అవని యేను మేలు! హర్మ్యములు గలవు!
    వల్లకాడు చూడ వసతి లేని
    తలము! పోవ నేల? తట్టని చట్టని
    శవమ లేచి రమ్ము సంతసమున!

    జిలేబి

    రిప్లయితొలగించండి
  11. నదులు యెండి పోయె నాలుకలారిపోయె
    శవమ లేచి రమ్ము సంతసమున"
    నీవె జనుల యుసురు నిలుపగలవు గాన
    భూమి నుండి పైకి బొర్లు మమ్మ

    రిప్లయితొలగించండి
    రిప్లయిలు
    1. సీతారామయ్య గారూ,
      మీ పూరణ బాగున్నది. అభినందనలు.
      'నదులు + ఎండి' అన్నపుడు సంధి నిత్యం. యడాగమం రాదు. మొదటి పాదం చివర గణదోషం. "నదులె యెండిపోయె నాలుక లారెను" అనండి.

      తొలగించండి
  12. అవమా నంబుల నెన్నిదా టితివొ నాకంబం దునన్ హాయిగా
    స్తవనీ యంబగు జీవనం బునను ప్రాశస్త్యం బుగాతోచినన్
    కవనం బల్లుచు కీర్తికా ముకుడ వైకావ్యం బులేవ్రా యగన్
    శవమా సంతస మొప్ప రమ్ము వడిగన్ శశ్వద్య శశ్శాలివై

    రిప్లయితొలగించండి
  13. (ఉందో లేదోస్వర్గం నాపుణ్యం నాకిచ్చెయ్!
    సర్వస్ అర్పిస్తా నా బాల్యం నాకిచ్చెయ్!!... అన్న గజల్ మత్లాకు పద్యానువాదం..)


    భవుడా! స్వర్గము యున్నదెంత నిజమో?భస్మాంగ!విశ్వేశ్వరా!
    శివ! నాపుణ్యము నాకునిమ్ము యభవా!శ్రీకంఠ!నాసర్వమున్
    లవమంతైనను లేక చేకొనుచు బాల్యమ్మిమ్మ, చిన్నారి శై
    శవమా సంతస మొప్ప రమ్ము వడిగన్ శశ్వద్యశశ్శాలివై

    రిప్లయితొలగించండి
    రిప్లయిలు
    1. రాకుమార గారూ,
      మీ పూరణ బాగున్నది. అభినందనలు.
      'స్వర్గము + ఉన్న, ఇమ్ము + అభవా' అన్నపుడు సంధి నిత్యం. "స్వర్గము గల్గుటెంత... నా కొసంగు మభవా..." అనండి.

      తొలగించండి
  14. బ్రతికినన్ని నాళ్లు భారమంచు దలచి
    తల్లి దండ్రి యెడల దయయు లేక
    కర్మ కాండ లెంతొ ఘనముగా జేయునో
    శవమ లేచి రమ్ము సంతసమున

    రిప్లయితొలగించండి
  15. ..............🌻శంకరాభరణం🌻...............
    ..................🤷🏻‍♂సమస్య 🤷‍♀....................
    శవమ లేచి రమ్ము సంతసమున

    సందర్భము: లోకంలో తమకే యౌవనం రాబోతున్నట్టు తెగ సంబర పడిపోతూ వుంటారు యువతీ యువకులు. అంతకు మించిన సుఖం లేనట్టు భ్రాంతి జెందుతుంటారు.
    కాని తమకు తెలియకుండానే శైశవాన్ని కబళించిన కాలం యౌవనాన్ని కూడా కబళించివేయలేదా! ఆ తరువాత ముసలితనం రాదా! చిట్టచివరకు మృత్యువూ రాదా!
    ~~~~~~~~~~~~~~~~~~~~~~~
    సుఖముమీది భ్రాంతి సుడివడ "పొమ్ము..శై

    శవమ!.. లేచి రమ్ము సంతసమున

    యౌవనమ్మ!" యనెడు న ట్లాతురులయినన్

    ముదిమి.. పిదప రాదె! ముప్పు రాదె!

    ✒~డా.వెలుదండ సత్యనారాయణ
    పరమార్థ కవి
    30.7.19
    -----------------------------------------------------------

    రిప్లయితొలగించండి

  16. ఆ వల్ల కాటి లో యేం చేస్తావు గానీ మా సభలో కొచ్చేయ్ :)


    అవనిన్ చూడగ కైపులెన్ని కలవో! అబ్బబ్బొ వేగమ్ము గా
    కవనమ్ముల్ భళి వ్రాయ వచ్చు ధృతితో కాఫీ జిలేబీలతో
    శవమా సంతస మొప్ప రమ్ము వడిగన్ శశ్వద్యశశ్శాలివై
    భువిలో పేరును గాంచ వచ్చునిక సంపూర్ణంబుగా రావె ! రా!


    జిలేబి

    రిప్లయితొలగించండి
  17. పింఛ నిత్తురంచు విసుగు లేక విధిగ
    తిరిగి నన్ని నాళ్ళు తిప్పి తిప్పి
    సిద్ధమంటు నేడు చీటి పంపిరి నీకు
    శవమ లేచి రమ్ము సంతసమున

    రిప్లయితొలగించండి
  18. దత్త పదులు, పద్య ధారలు వర్ణనల్,
    మంచి పూరణల సమస్య లందు,
    అక్షరంపు సొబగులవధానగరిమనా
    శవమ లేచి రమ్ము సంతసమున..

    ఆశవము = ఆశుత్వము, వడి

    రిప్లయితొలగించండి
  19. కఠినమౌ సమస్య కమ్మదనమ్మును
    చింద పూరణమ్ము సేయు పటిమ
    శంకరాభరణపు సాధనమ్మొసగ నా
    శవమ లేచి రమ్ము సంతసమున

    (*ఆశవము= ఆశుత్వము)

    రిప్లయితొలగించండి
  20. క్రొవ్విడి వెంకట రాజారావు:

    పాటవమ్ము తోడ పాశిని మెప్పించి
    వరము నొంది తాను వచ్చె నిపుడు
    జనులు హర్ష మొంద సావిత్రి ప్రియునిదౌ
    శవమ! లేచి రమ్ము సంతసమున.

    రిప్లయితొలగించండి
  21. చంద్రమతి సుతుండు చచ్చె పాముకఱచి
    గాధి సుతుడు వచ్చి కరుణ జూపి
    తనదు మాయ తెలిపి తాను పిలిచె నిట్లు
    శవమ లేచి రమ్ము సంతసమున

    రిప్లయితొలగించండి
  22. బాల్య దశను నుండిబంధువర్గమునకు
    సేవజేయుకతన శీఘ్రముగను
    బడుగు బ్రజల సేమ మడుగవ లయునుశై
    శవమ! లేచిరమ్ముసంతసమున


    రిప్లయితొలగించండి
  23. పరమ పురుషు గూర్చి పద్యమొక్కటి జెప్ప
    నెంచి నాను నేను నియమ ముగను
    ప్రాస గణ యతులను ప్రావీణ్య మొప్ప నా
    శవమ లేచి రమ్ము సంతసమున.

    రిప్లయితొలగించండి
    రిప్లయిలు
    1. మీ పూరణ బాగున్నది. అభినందనలు.
      'ప్రావీణ్య మొప్ప నాశవము'.... పద విభాగం?

      తొలగించండి
  24. పరమ ముదకరములు బాల్యస్మృతులు కాల
    మహిమ మేరి కెఱుక మరలి రా ద
    యినను నేడు నిన్న యేఁ గోరుచుందు శై
    శవమ! లేచి రమ్ము సంతసమున


    హవనీయమ్ముల నీయఁ జాల నకటా యాచింపకే కాచితే
    యవనీశుండగు నంబరీషు నల నే నర్చింతు నోరారఁగా
    నవనార్థంబు సహస్రధార! స రణోద్యత్పాంచజన్యంబ! కే
    శవమా! సంతస మొప్ప రమ్ము వడిగన్ శశ్వద్యశశ్శాలివై

    [కేశవము = విష్ణువునకు సంబంధించినది]

    రిప్లయితొలగించండి
  25. భువిలో వెళ్ళిన బాణమున్ వచనమున్ మోఘంపు కాలంబు శై
    శవమున్ ప్రాణము లేచివచ్చునొకో చార్వాకులేరీతి యా
    భవనాశావ్యయు గాంచనేర్తురు హరీ బ్రారబ్ధముంద్రుంప గే
    *శవ!మా సంతస మొప్ప రమ్ము వడిగన్ శశ్వద్యశశ్శాలివై*

    రిప్లయితొలగించండి
  26. ఆటవిడుపు సరదా పూరణ:
    (జిలేబి గారికి అంకితం)

    "Marriage is the funeral of bachelorhood"

    అవురా! ఎంతటి తప్పు చేసితినిరా! అత్తయ్యనున్ దెచ్చుచున్
    పవలున్ రాతిరి కోరునే వసతినిన్ బంజార హిల్సందునన్...
    నవరత్నమ్ముల మించెడిన్ సఖులతో నా బ్రహ్మచర్యమ్మునౌ
    శవమా సంతస మొప్ప రమ్ము వడిగన్ శశ్వద్యశశ్శాలివై!

    రిప్లయితొలగించండి
  27. మత్తేభవిక్రీడితము
    జవసత్వమ్ములు నంతరించె నిలలో సంబంధముల్ వీడగన్
    పవలున్ గట్టిన మేడలన్ యిసుకలో బాయంగ సాయంత్రమున్
    లవలేశమ్మును గుందకన్ మరల మేడల్ గట్టి రంజిల్లు శై
    శవమా! సంతస మొప్ప రమ్ము వడిగన్ శశ్వద్యశశ్శాలివై

    రిప్లయితొలగించండి
    రిప్లయిలు
    1. మీ పూరణ బాగున్నది. అభినందనలు.
      'మేడలన్ + ఇసుకలో' అన్నపుడు యడాగమం రాదు. "మేడలం దిసుకలో..." అందామా?

      తొలగించండి
    2. గురుదేవులకు ధన్యవాదములు. సవరించుకుంటాను.

      మత్తేభవిక్రీడితము
      జవసత్వమ్ములు నంతరించె నిలలో సంబంధముల్ వీడగన్
      పవలున్ గట్టిన మేడలందిసుకలో బాయంగ సాయంత్రమున్
      లవలేశమ్మును గుందకన్ మరల మేడల్ గట్టి రంజిల్లు శై
      శవమా! సంతస మొప్ప రమ్ము వడిగన్ శశ్వద్యశశ్శాలివై

      తొలగించండి
  28. ఆ: వరము నిచ్చె నాకు పాతాళ భైరవి
    పడిన ప్రాణి కిపుడు ప్రాణ మిడెద
    పాడెనున్న శిశువు బ్రతికివచ్చుకనుడు
    శవమ! లేచి రమ్ము సంతసమున

    రిప్లయితొలగించండి
  29. ఎవరీ గోపిక లన్న యెల్లిదమొ? యింకేమౌనులే వెఱ్ఱులీ
    జవరాండ్ర న్విడనాడ నన్న తలపో? జాలమ్మె నీ నైజమో?
    యెవరో చెప్పిన మాటల న్వినకురా హే! వేణుగోపాల! కే
    శవ!మా సంతస మొప్ప రమ్ము వడిగన్ శశ్వద్యశశ్శాలివై.

    రిప్లయితొలగించండి


  30. రాయంగవచ్చు కందము
    ప్రాయమ వసరమ్ము లేదు బాలకుమారీ !
    సాయంబివ్వంగను కల
    దోయీ శంకరుని కొల్వు ద్యుతియున్ చేరన్!


    జిలేబి

    రిప్లయితొలగించండి
  31. అవనిన్ లేదుగనీకుమించినది యీయాంధ్రంబునందున్సు శై
    శవమా! సంతసమొప్ప రమ్మువడిగన్ శశ్వద్యశశ్శాలివై
    భువనంబంతకుమేలుసేయగను సంపూర్ణంబ నీయున్కియే
    శవమేయీశ్వరరూపమౌననుచునాశాజీవులెంచన్ శుభమ్

    రిప్లయితొలగించండి
  32. క్రొవ్విడి వెంకట రాజారావు:

    అవిరామమ్ముగ మోసపూరితపు చెయ్దమ్ముల్నిటన్ గూర్చుచున్
    పవిదిన్ గూడని దుష్ట పోకడల చాపల్యంబుతో దోరుచు
    న్నవనిన్ పెంపగు వారినెల్ల నిల మాపున్ జేయగా తండ్రి కే
    శవ! మా సంతస మొప్ప రమ్ము వడిగన్ శశ్వద్యశ్శాలివై.

    రిప్లయితొలగించండి
  33. ఆటవెలది
    మమ్ము వీడి నీవు మరణించి నంతట
    మార్చురీకిఁ జేరె మరణశయ్య
    కాసులివ్వలేము కావలికాండ్లకు
    శవమ! లేచి రమ్మ సంతసమున

    రిప్లయితొలగించండి
  34. మత్తేభవిక్రీడితము
    నవమాసమ్ములు నిండినట్టి మగువే నాణెమ్ము లేదన్ననే
    యవరోధమ్ముల కన్నుమూసె నట కాయంబీయ పైకమ్మెగా!
    నవినీతన్నది పెచ్చురేగెను ప్రభుత్వాస్పత్రులన్ సైతమున్
    శవమా! సంతస మొప్ప రమ్ము వడిగన్ శశ్వద్యశశ్శాలివై

    రిప్లయితొలగించండి
  35. క్రొవ్విడి వెంకట రాజారావు:

    పవిదిన్ గూడిన వాదమాడి తను నా పాతంగినే వేడగా
    వ్యవధిన్ జూపక నామె కోర్కెలను సంభావించి కీనాశుడున్
    వివశత్వంబున నిన్నెడె న్నెఱిని సావిత్రీ సతీ భర్తదౌ
    శవమా! సంతసమొప్ప రమ్ము వడిగన్ శశ్వద్యశశ్శాలివై.

    రిప్లయితొలగించండి
  36. అవనిన్ ధర్మము నిల్ప రక్కసుల సంహారమ్ము నేజేయగా
    నవతారమ్ముల దాల్చినావుగదరా యక్షోభ్య మమ్మేలగా
    నవిరామమ్ముగ నిన్ను గొల్చెదను నాయభ్యర్థనన్ గాంచి కే
    శవ మా సంతసమొప్ప రమ్ము వడిగన్ శశ్వద్యశశ్శాలివై.

    రిప్లయితొలగించండి
  37. పరవశమున పలికె పాటగాడొక్కడు
    పండ్లు సరిగలేక పాడుచుండె
    పరవశ మనబోయి పల్కెపాట పరవ
    శవమ లేచి రమ్ము సంతసమున!!

    రిప్లయితొలగించండి