24, ఏప్రిల్ 2011, ఆదివారం

సమస్యా పూరణం - 317 (పూలన్ దేవిని గొలిచిన)

కవి మిత్రులారా,
ఈ రోజు పూరించ వలసిన సమస్య ఇది ........
పూలన్ దేవిని గొలిచినఁ బుణ్యము దక్కున్.

24 కామెంట్‌లు:

  1. మేలము లాడకు, సంధ్యా
    వేళను దేవికి, జగాన విరిసిన పూలన్,
    బేలా! పరిమళ మిచ్చెడి
    పూలన్, దేవిని గొలిచినఁ బుణ్యము దక్కున్

    రిప్లయితొలగించు
  2. శ్రీ లలితా, పరమేశ్వరి,
    శైలజ, శ్రీకంఠు రాణి, చండిని నియతిన్
    మాలతి జాజీ చంపక
    పూలన్;దేవిని గొలిచిన బుణ్యము దక్కున్!

    రిప్లయితొలగించు
  3. బాలను, యమ్మల కమ్మను
    లీలగఁ జగముల సృజించు లేమను, నేనీ
    వేళన్ కలువల, తామర
    పూలన్, దేవిని గొలిచినఁ బుణ్యము దక్కున్

    రిప్లయితొలగించు
  4. కాలానుగుణ్యమై , మృదు
    లీలా నవ పుష్ప చయములే విరబూసెన్ !
    మాలన్ గూర్చగ వలె నీ
    పూలన్; దేవిని గొలిచిన బుణ్యము దక్కున్ !!!

    రిప్లయితొలగించు
  5. హనుమచ్చాస్త్రి గారూ మందాకిని గారూ- చక్కని , మధురమైన పూరణలు .
    శంకరయ్య గారి అనుమతి తో , ఒక విషయం . సమాస సంఘటనములో , తెలుగు మీద సంస్కృతము రావచ్చును . సంస్కృతము మీద తెలుగు రాదు . ఉదాహరణకు , మర్రి చెట్టు అనవచ్చు , మర్రి వృక్షమూ అనవచ్చు . వట వృక్షము అని మాత్రమే అనవలసి ఉంటుంది . వట చెట్టు అని అనకూడదు . 'పూలన్ ' పదము తెలుగు కనుక ఆ పైన ప్రయోగించే ఏ పదమైనా , తెలుగే వుండేలా చూసుకోవాలి . ఇక్కడ సమాస సంఘటనము చేయలేము . ఇది ఒక సాధారణమైన పొరపాటు . ' చంపక పుష్పాలు ' అనవలసినదే తప్ప ' చంపక పూలు ' అనలేము ! ' సంధ్యా వేళ ' కూడ అలాంటిదే !

    రిప్లయితొలగించు
  6. అందరికీ వందనములు !
    అందరి పూరణలూ
    అలరించు చున్నవి !
    01)
    __________________________________

    మీలిత నేత్రను , శక్తిని
    ఫాలాక్షుని సతిని , భక్తి - భావము తోడన్
    మాలలుగ కూర్చి వన్నెల
    పూలన్ దేవిని గొలిచినఁ బుణ్యము దక్కున్ !
    __________________________________

    రిప్లయితొలగించు
  7. 02)
    __________________________________

    శూలాయుధాది పాణిని
    కాలంజరి ,గిరిక,కాళి - కౌశికి , మాతన్
    మాలాలంకృత ధారిని
    పూలన్ దేవిని గొలిచినఁ బుణ్యము దక్కున్ !
    __________________________________

    రిప్లయితొలగించు
  8. మేలము లాడకు, నిపుడీ
    వేళను దేవికి, జగాన విరిసిన పూలన్,
    బేలా! పరిమళ మిచ్చెడి
    పూలన్, దేవిని గొలిచినఁ బుణ్యము దక్కున్

    విష్ణునందన్ గారూ, ధన్యవాదాలు.
    మీరు చెప్పిన సవరణ కు కృతజ్ఞురాలిని.
    మార్చాను.

    రిప్లయితొలగించు
  9. వేలకు వేలను జంపిన
    పూలన్ దేవిని తలచిన బుగులే కలుగున్ !
    వేళకు ఫలముల దళముల
    పూలన్, దేవిని గొలిచిన పుణ్యము దక్కున్ !

    రిప్లయితొలగించు
  10. 03)
    __________________________________

    బాలేందుమౌళి భార్యను
    బాలను, భగవతి ,భవాని - భార్గవి ,భవ్యన్
    శైలజ ,శివాని,శారద
    పూలన్ దేవిని గొలిచిన - బుణ్యము దక్కున్ !
    __________________________________

    రిప్లయితొలగించు
  11. చాలిక లౌక్యపు కవితల్
    కాలుని బాధ తొలుగుటకు కవులిక భక్తిన్
    మేలగు పద్యంబుల చం
    పూలన్ దేవిని గొలిచినఁ బుణ్యము దక్కున్!!

    చంపూ = పద్య గద్యములతో కూడిన కావ్యము

    రిప్లయితొలగించు
  12. విష్ణునందన్ గారూ! నియమమును సవివరముగా తెలిపినందులకు ధన్యవాదములు.సవరించి పూరించుచున్నాను.

    శ్రీ లలితా, పరమేశ్వరి,
    శైలజ, శ్రీకంఠు రాణి, చండిని ప్రాతః
    కాలము నందున తెల్లని
    పూలన్; దేవిని గొలిచిన బుణ్యము దక్కున్!

    రిప్లయితొలగించు
  13. మందాకిని గారూ,
    మీ రండు పూరణలూ బాగున్నాయి. అభినందనలు.
    డాక్టరు గారి టానిక్కు పనిచేసింది. సంతోషం.

    గోలి హనుమచ్ఛాస్త్రి గారూ,
    మనోహరంగా ఉంది మీ పూరణ. అభినందనలు.
    డాక్టర్ గారి మందు మీకూ పనిచేసించి. సంతోషం.

    డా. విష్ణు నందన్ గారు,
    మీ పూరణ "మృదు లీలా నవ పుష్పమాల"యై కవితాపరిమళాలను వెదజల్లుతున్నది. మహదానందం.
    మిత్రుల పూరణలలోని గుణదోష విచారణ చేసి(స్తు)నందుకు ధన్యవాదాలు.

    వసంత్ కిశోర్ గారూ,
    మీ మూడు పూరణలూ అద్భుతంగా ఉన్నాయి. అభినందనలు.

    నాగరాజు రవీందర్ గారూ,
    మీ పూరణ వైవిధ్యంగా, చక్కగా ఉంది. అభినందనలు.

    జిగురు సత్యనారాయణ గారూ,
    మీ పూరణ చమత్కారజనకంగా ఉంది. అభినందనలు.
    కాని "చంపువు" బహువచనం "చంపూ" అవుతుందా అని సందేహం.

    రిప్లయితొలగించు
  14. డా.విష్ణునందన్ గారికి చక్కటి ప్రాథమిక సూత్రము వివరించినందులకు ధన్యవాదాలు. అదివరలో విన్నవించుకొన్న మనవి మరొక్కసారి, నిష్ణాతులైన మీవంటి వారు (మీరు, చింతా వారు, ఫణీంద్ర గారూ, శంకరయ్యగారూ, భైరవభట్ల వగైరా) ప్రతి సమస్యని తప్పక పూరించవలెనని, మీ సమయానుకూలాన్ని బట్టి. అందువలన మేము ఆ పద్యాలు చదివి పరిశీలించి మీరు చెప్పకనే చెప్పే పాఠాలు యెన్నో మాకే తెలియకుండా నేర్చుకొంటాము. నా స్వగతంలోంచి రెండు మాటలు. ప్రొఫెసర్.రాజారామన్ గారు (IISc, Bangalore) యెప్పుడూ 100 level courses చెప్పేవారు. నేను ఆయనని ఒకసారి అడిగాను. ఎందుకండీ అలా, అని. Basic courses చెప్పి నేర్పించటం ఒక challenge బాబూ అన్నారు. అట్లాగే, మా సంగీతం మాష్టారు. గొప్ప వయోలిన్ విద్వాంసులు - బాల పాఠాలు చెప్పటం ఎంతో కష్టమండి. ఏమీ తెలియని వారికి నేర్పించ గలిగినపుడే నా విద్యకి సార్థకత అనేవారు. అదేరకంగా శంకరయ్య మాష్టారు కూడా. వారి ఓపిక సదా ప్రశంసనీయం. కొందరు నిష్ణాతులు బాల పాఠాలు చెప్పలేక పోవచ్చు కానీ వారి పద్యాలే మాబోంట్లకు పాఠాలు.

    రిప్లయితొలగించు
  15. నేలకు,నింగికి,నిప్పుకు,
    గాలికి,నీటికిని మూడు కాలమ్ములకున్
    లీలా రూపము, గూర్చుము
    పూలన్;దేవిని గొలిచినఁ బుణ్యము దక్కున్!

    రిప్లయితొలగించు
  16. ఏలా సరసుల వనముల
    నేలా నిర్జన ములందు నేలా రాళ్ళన్
    యేలా వెదకెదు? మదులను
    పూలన్ దేవిని గొలిచినఁ బుణ్యము దక్కున్.

    రిప్లయితొలగించు
  17. హాలా హలమును మ్రింగిన
    శూలాయుధ పాణి శివుని సతినిల కొలువన్ !
    నీలోత్పలములు దోసెడు
    పూలన్ దేవిని గొలిచిన బుణ్యము దక్కున్ !

    రిప్లయితొలగించు
  18. అక్కయ్యగారూ,
    మనోజ్ఞమైన పూరణ.
    రెండో పాదం కొంచెం సరి చూడాలేమో.

    రిప్లయితొలగించు
  19. మంద పీతాంబర్ గారూ,
    మీ పూరణ చాలా బాగుంది. అభినందనలు.

    మిస్సన్న గారూ,
    పూరణ పద్యం మనోహరంగా ఉంది. అభినందనలు.

    రాజేశ్వరి నేదునూరి గారూ,
    దోసెడు నీలోత్పలాలతో దేవీపూజ చేసారు. అద్భుతంగా ఉంది. అభినందనలు.
    రెండవ పాదంలో యతి తప్పింది.
    "శూలాయుధ పాణి శివుని సుదతిని కొలువన్" అంటే సరి.

    రిప్లయితొలగించు
  20. కాలము రీతులు మారెన్
    పాలించెడి నేతలనిక వదలక నెపుడున్
    మాలల తోడన్, తెగడక
    పూలన్ దేవిని, గొలిచినఁ బుణ్యము దక్కున్

    రిప్లయితొలగించు
    రిప్లయిలు
    1. ప్రభాకర శాస్త్రి గారూ,
      మీ పూరణ బాగున్నది. అభినందనలు.

      తొలగించు
  21. శంకరాభరణం సమస్య - 317

    "పూలన్ దేవిని గొలిచినఁ బుణ్యము దక్కున్"

    ఆలూ, చేపలు తినుచును
    నాలుక పై నెత్రు జూపి నర్తన మిడెడిన్
    కాళీ ఘాటున వెలసిన
    పూలన్ దేవిని గొలిచినఁ బుణ్యము దక్కున్

    (కంది శంకరయ్య గారి సౌజన్యంతో)

    రిప్లయితొలగించు