6, మే 2018, ఆదివారం

సమస్య - 2670 (దేహము విడనాడి...)

కవిమిత్రులారా,
ఈరోజు పూరించవలసిన సమస్య ఇది...
"దేహము విడనాడి చూడు ధీరత్వమునన్"
(లేదా...)
"దేహమ్మున్ విడనాడి చూడుము సఖా ధీరత్వ మేపారఁగన్"
(బొగ్గరం V.V.H.B. ప్రసాద రావు గారికి ధన్యవాదాలతో...)

121 వ్యాఖ్యలు:

  1. హాహా కారము జేయక
    దేహము విడనాడి చూడు ధీరత్వమునన్
    మోహపు తిమిరము తొలగగ
    సాహసమున పొందవచ్చు సంతస మెపుడున్

    ప్రత్యుత్తరంతొలగించు
  2. "భిద్యతే హృదయగ్రన్థిశ్ఛిద్యన్తే సర్వసంశయాః
    ........
    కశ్చిద్ధీరః ప్రత్యగాత్మానమైక్ష-
    దావృత్తచక్షురమృతత్వమిచ్ఛన్!"


    దేహమ్ము నేను కాదని
    కోహమ్మని తరచి చూచి కోరిక తీరన్
    సోహమ్మని కనుగొని సం
    దేహము విడనాడి చూడు ధీరత్వమునన్!

    ప్రత్యుత్తరంతొలగించు
    ప్రత్యుత్తరాలు
    1. ప్రభాకర శాస్త్రి గారూ,
      మీ పూరణ ప్రశస్తంగా ఉన్నది. అభినందనలు.

      తొలగించు


  3. ఓ హారిక! వినవే! సం
    దేహము విడనాడి చూడు ధీరత్వమునన్
    స్నేహంబున తక్కువగా
    డే! హంకారియునుగాడు!రేడితడేనే !

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. 👏👏👏

      * శార్దూలమ్మదిగో జిలేబి కనుమా శాస్త్రీయ మేపారగన్

      తొలగించు
    2. జిలేబీ గారూ,
      మీ పూరణ బాగున్నది. అభినందనలు.
      'డ-ర' లకు యతిమైత్రి లేదు.

      తొలగించు
  4. మోహమ్మును విడువుము, సం
    దేహమ్ము విడనాడి చూడు ధీరత్వమునన్,
    ద్రోహుల జంపు, కపిధ్వజ
    వాహనుడా యనుచు బలికె నర్జుని తోడన్

    రణమున బంధువులను జంపుటకు సంశయము పొందుచున్న అర్జునిని కాంచి కృష్ణుడు పలికిన పలుకులు

    ప్రత్యుత్తరంతొలగించు
    ప్రత్యుత్తరాలు
    1. బాగున్నది సార్! 👏👏👏

      నాల్గవ పాదము యతి సరియా?

      తొలగించు
    2. కృష్ణ సూర్యకుమార్ గారూ,
      మీ పూరణ బాగున్నది. అభినందనలు.
      'దేహము విడనాడి...' టైపాటు...
      నాల్గవ పాదంలో యతిదోషం. సవరించండి.

      తొలగించు
  5. మైలవరపు వారి పూరణ

    వరూధిని.... ప్రవరునితో...

    మోహమ్మున్ గొన బారిపోయెదవొకో ? మూర్ఖత్వమౌ ! ముక్తికీ
    మోహమ్మే పథమౌను తుట్టతుదకున్ , భూదేవ ! కామాత్మనై
    బాహుద్వంద్వము జాచి యొంటినిట నిల్వన్ జుల్కనా నీకు ? సం...
    దేహమ్మున్ విడనాడి చూడుము సఖా ! ధీరత్వ మేపారఁగన్ !!

    మైలవరపు మురళీకృష్ణ వెంకటగిరి

    ప్రత్యుత్తరంతొలగించు
    ప్రత్యుత్తరాలు
    1. మైలవరపు వారి పూరణ అద్భుతంగా ఉన్నది. అభినందనలు.

      తొలగించు
    2. అనగా.. అనగా.. ఒక పులి....


      దేహంబా కృశమయ్యె , దంతముల దీప్తిన్ జూడు శుష్కంబు , నే...
      నాహారంబు దినంగజాల , గడు పాపాత్ముండ బూర్వమ్మునం ,
      దే హానిన్ దలపెట్టఁ గంకణమిదే ! యేమింక నీ శంక ? సం...
      దేహమ్మున్ విడనాడి చూడుము సఖా ! ధీరత్వ మేపారఁగన్ !
      సాహాయ్యమ్మును పొందుమీ జలములన్ స్నాతుండవై రమ్ము , నీ
      యాహార్యమ్మును గాంచ బీదవ "ని వ్యాఖ్యానింప , దద్వ్యాఘ్రవా..
      ఙ్మోహావిష్టుడునై మృతిన్ గొనెను ధీమూఢుండు పాంథుండటన్ !!

      మైలవరపు మురళీకృష్ణ వెంకటగిరి

      తొలగించు
  6. ఉత్తరుని ప్రగల్భాలుగా (బృహన్నలతో)

    సాహసినౌ నను గాంచిన
    నాహవమం దెదుటనగల యరివీరులె దా
    సోహమ్మనరే, యిక సం
    దేహము విడనాడి చూడు ధీరత్వమునన్.

    ప్రత్యుత్తరంతొలగించు
    ప్రత్యుత్తరాలు
    1. విరించి గారూ,
      మీ పూరణ బాగున్నది. అభినందనలు.
      '...ఎదుటను గల...' అనండి.

      తొలగించు
  7. (మరొక సతితో అశ్వమేధం రాముడు చేస్తున్నాడేమో
    నని తలచే సీతతో వాల్మీకి మహాముని )
    ఊహలు చాలు ; పసిడి వై
    దేహిని ప్రక్కన నిడుకొని దివ్యుడు రాముం
    డా హయమేధ మొనర్చు ; సం
    దేహము విడనాడి చూడు ధీరత్వమునన్ .

    ప్రత్యుత్తరంతొలగించు
    ప్రత్యుత్తరాలు
    1. సాహసమును వదలక సం
      దేహము విడనాడి చూడు ధీరత్వమునన్
      బాహిర లోకానందము
      కాహళి నూదంగ పాందగా మది
      మది శాంతిన్

      తొలగించు
    2. బాపూజీ గారూ,
      పూరణకు చక్కని అంశాన్ని ఎన్నుకున్నారు. బాగుంది. అభినందనలు.
      మూడవ పాదంలో గణదోషం. సవరించండి.
      **********************
      ప్రసాద రావు గారూ,
      మీ పూరణ బాగున్నది. అభినందనలు.
      'మది మది' టైపాటు....

      తొలగించు
    3. శంకరార్యులకు , సత్యనారాయణ రెడ్డి గారికి ధన్యవాదాలు . సవరించిన పద్యం :
      ఊహలు చాలు ;పసిడి వై
      దేహిని ప్రక్కన నిడుకొను దివ్యుడు రాముం
      డా హయమేధకరుడు ; సం
      దేహము విడనాడి చూడు ధీరత్వమునన్ .

      తొలగించు
  8. మూడవ పాదం మూడవ గణం రగణం వచ్చింది సరిచేయండి.

    ప్రత్యుత్తరంతొలగించు
  9. మోహము వీడుము స్వజనుల
    పై;హనువున వెంటరారు;బావా!కౌంతే
    యా!రణమును సల్పుము;సం
    దేహము విడనాడి చూడు ధీరత్వమునన్"

    ప్రత్యుత్తరంతొలగించు
    ప్రత్యుత్తరాలు
    1. శాంతిభూషణ్ గారూ,
      మీ పూరణ బాగున్నది. అభినందనలు.

      తొలగించు
    2. శాంతిభూషణ్ గారూ,
      మూడవ పాదం ప్రాస???

      తొలగించు
    3. శాంతిభూషణ్ గారూ,
      మూడవ పాదం ప్రాస???

      తొలగించు
  10. శ్రీహరి పూజల కొరకై
    దేహము విడనాడి చూడు ధీరత్వమునన్
    మోహమును జయించి భువిని
    వాహనమేతెంచు హరి నివాసము చేర్చన్

    ప్రత్యుత్తరంతొలగించు
    ప్రత్యుత్తరాలు
    1. అన్నపరెడ్డి వారూ,
      మీ పూరణ బాగున్నది. అభినందనలు.

      తొలగించు
  11. సాహస మున నె దు రు నిలిచి
    పాహి యన క నిడు ము ల కును పంతము తోడ న్
    మోహ ము దరి జేరని సం
    దేహము విడనాడి చూడు ధీరత్వము న న్

    ప్రత్యుత్తరంతొలగించు
    ప్రత్యుత్తరాలు
    1. రాజేశ్వర రావు గారూ,
      మీ పూరణ బాగున్నది. అభినందనలు.

      తొలగించు
  12. గేహము నాత్మకు దేహము
    మోహమ్మును పొందవలదు మూర్ఖపు మనసా
    సాహసి వై బ్రతుకు కడకు
    "దేహము విడనాడి చూడు ధీరత్వమునన్"

    ప్రత్యుత్తరంతొలగించు
    ప్రత్యుత్తరాలు
    1. విట్టుబాబు గారూ,
      మీ పూరణ బాగున్నది. అభినందనలు.

      తొలగించు
  13. మిత్రులందఱకు నమస్సులు!

    [ఉత్తర గోగ్రహణ సమయాన శమీవృక్షము పైనున్న గాండీవమును దించి, యతఁడు నిజమైన యర్జునుఁడేనా యని సందేహించుచున్న యుత్తరుని చేఁతియందలి గాండీవముం దాఁకి, యర్జునుండు తన నిజరూపమ్ముం బొంది, "యో యుత్తరకుమారా! యా యర్జునుఁడే యీ బృహన్నల! నీ సందేహమును విడనాడి, నీ ధీరత్వ మేపారఁగా ననుం జూడుము! నీ యజ్ఞానము నశించి, జ్ఞానము బోధపడఁగల" దని చెప్పుచున్న సందర్భము]

    "మోహాగ్నుల్ కనుఁగప్ప నీకు నెవియున్ బూర్ణంబుగాఁ దోఁచకే,
    దాహార్తిం బడి పోల్చవైతి విఁక నో ధర్మాత్మ! గాండీవినై
    సోఽహమ్మంచును జెప్పుచుంటి నెదుటన్ జూపించి నా రూపు! సం
    దేహమ్మున్ విడనాడి చూడుము సఖా ధీరత్వ మేపారఁగన్!"

    ప్రత్యుత్తరంతొలగించు
    ప్రత్యుత్తరాలు
    1. మధుసూదన గారూ,
      మీ పూరణ అద్భుతంగా ఉన్నది. అభినందనలు.

      తొలగించు
    2. ధన్యవాదాలండీ శంకరయ్య గారూ!

      తొలగించు
  14. మోహము విడు,ననిలోసం
    దేహము విడనాడి చూడు ధీరత్వమునన్
    ద్రోహులను జంపుము ధవళ
    వాహనుడ యని గిరిధారి బలికె రణము లోన్

    ప్రత్యుత్తరంతొలగించు
    ప్రత్యుత్తరాలు
    1. కృష్ణ సూర్యకుమార్ గారూ,
      మీ పూరణ బాగున్నది. అభినందనలు.

      తొలగించు
  15. వాహినిలో మీమిత్ర స
    మూహమునందొకడు మునిగిపోవంగా నీ
    స్నేహితుని యుసురుపై సం
    దేహము విడ; నాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. సీతారామయ్య గారూ,
      మీ పూరణ వైవిధ్యంగా ఉన్నది. అభినందనలు.

      తొలగించు
  16. సమస్య :-
    "దేహము విడనాడి చూడు ధీరత్వమునన్"

    ఊహల చేతను కోపపు
    దేహము విడనాడి చూడు ధీరత్వమునన్
    మాహాల నీ బృహన్నల
    పోహణ విడిపించు నమ్మి పోరు కుమారా!
    ....................✍చక్రి
    మాహా : ఆవు
    పోహణ : నేర్పు

    ప్రత్యుత్తరంతొలగించు
    ప్రత్యుత్తరాలు
    1. చక్రపాణి గారూ,
      మీ పూరణ బాగున్నది. అభినందనలు.

      తొలగించు
  17. డా.పిట్టాసత్యనారాయణ
    మోహము నాపవు ప్రాణము
    గేహంబున నుందు ననుచు గీ పెట్టును నీ
    సో.హ.పు సాధన యేమయె
    దేహము విడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. డా. పిట్టా వారూ,
      మీ పూరణ బాగున్నది. అభినందనలు.

      తొలగించు
  18. గురువర్యులు శ్రీ కంది శంకరయ్య గారి శంకరాభరణం
    సమస్యాపూరణ :: నేటి సమస్య సంఖ్య-2670
    సమస్య :: *దేహమ్మున్ విడనాడి చూడుము సఖా! ధీరత్వ మేపారగన్.*
    దేహాన్ని వదలివేసి చూడు. నీవు ధీరుడివి అని చెప్పడం ఈ సమస్యలో ఉన్న విరుద్ధమైన అర్థం.
    సందర్భం :: శ్రీ కృష్ణ భగవానుడు అర్జునునికి తన విశ్వరూపాన్ని చూపించి ఓ పార్థా! { *మత్తః పరతరం నాన్యత్ కించిదస్తి* }అన్నింటికీ కారణం నేనే. నా మహిమను చూడు. ఉత్సాహాన్ని పొందు. {నీవు *న చ శ్రేయోఽనుపశ్యామి హత్వా స్వజన మాహవే....* అని అనకుండా} నావాళ్లు అని నీవనుకొంటున్న వారిపై మమకారాన్ని విడిచిపెట్టు. { *అసంగ శస్త్రేణ దృఢేన ఛిత్వా* అనేనా మాటను స్మరించి} మాయను ఛేదించు. నేను ఆహా అని నిన్ను మెచ్చుకొనేటట్లు { *యుధ్యస్వ విగత జ్వరః* } ధర్మయుద్ధం చేయి. { *నః పాపమేవాశ్రయే దస్మాన్ హత్వా* అని భావించకుండా} వీరిని చంపితే పాపం వస్తుందేమో అనే సందేహాన్ని వదలిపెట్టి చూడు. ఉత్తమ క్షత్రియుడవుగా వీరుడవుగా ధీరుడవుగా మెలగు. అని గీతోపదేశం చేస్తున్న సందర్భం.

    ఊహాతీతము నా మహత్తు గనుమా! ఉత్సాహమున్ బొందుమా!
    స్నేహమ్మున్ స్వజనమ్ముపై విడువుమా! ఛేదించుమా మాయ, నే
    నాహా యంచన ధర్మయుద్ధమునుచేయం బూనుమా! పార్థ ! సం
    *దేహమ్మున్ విడనాడి చూడుము సఖా! ధీరత్వ మేపారగన్.*
    *కోట రాజశేఖర్ పడుగుపాడు నెల్లూరు.* (6-5-2018)

    ప్రత్యుత్తరంతొలగించు
    ప్రత్యుత్తరాలు
    1. కోట రాజశేఖర్ గారూ,
      మీ పూరణ అద్భుతంగా ఉన్నది. అభినందనలు.

      తొలగించు
  19. మోహము వీడుటె ప్రగతికి
    దోహద పడుననిరి గాదె దోర్బల వర్తుల్
    సాహస మాయుధమౌ ;సం
    "దేహము విడనాడి చూడు ధీరత్వమునన్"

    ప్రత్యుత్తరంతొలగించు
    ప్రత్యుత్తరాలు
    1. జనార్దన రావు గారూ,
      మీ పూరణ బాగున్నది. అభినందనలు.

      తొలగించు
  20. డా.పిట్టా సత్యనారాయణ
    సోహమ్మున్ జపియించి ధ్యానమున నీ చూడ్కున్ సుషుమ్నన్ గనన్
    బాహాబాహినియూర్ధ్వపుం గతిని వే మార్లట్లు బోనోపితే!
    స్వాహా యౌగతి దేహమే కరుగ నా సాన్నిధ్యమే చేరువౌ!....
    ఓ.హో..యిప్పుడె సాహసమ్ము కరువౌ నూడ్చంగ భూ బంధమున్
    దేహమ్మున్ విడనాడి చూడుము సఖా ధీరత్వ మేపారగన్!
    (పండిట్ ఫకీర్చంచంద్ జీ మహరాజ్,హోషియార్పుర్(పంజాబ్)గారి రాధాస్వామిసత్సంగ్Hnkలో తమ 90వ యేట నుడివి కన్నీటి పర్యంత మవడం చూచి,R.S అవలంబిగా మీతో నా జ్ఞాపకాన్ని పంచుకున్నాను. స్వోత్కర్షగా భావించకూడదని మనవి)

    ప్రత్యుత్తరంతొలగించు
    ప్రత్యుత్తరాలు
    1. డా. పిట్టా వారూ,
      మీ పూరణ బాగున్నది. అభినందనలు.

      తొలగించు
  21. ద్రోహము తలపకు మెన్నడు
    మోహము విడనాడి చూడు ముక్తిలభించున్
    సాహసమున భావనలో
    దేహము విడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. జనార్దన రావు గారూ,
      మీ పూరణ బాగున్నది. అభినందనలు.

      తొలగించు
  22. కం:-
    మోహమ్మునబడి మిక్కిలి
    దాహమ్మునకు వెరవుపడి తల్రుట కంటెన్
    దేహమున దేహినెఱిగి సం
    దేహము విడనాడి చూడు ధీరత్వమునన్ !!!

    @ మీ పాండురంగడు *
    ౦౬/౦౫/౨౦౧౮
    తల్రుట..తలరుట:-బాధపడుట. దుఃఖించుట

    ప్రత్యుత్తరంతొలగించు
    ప్రత్యుత్తరాలు
    1. పాండురంగడు గారూ,
      మీ పూరణ బాగున్నది. అభినందనలు.

      తొలగించు
  23. (కృష్ణుడు అర్జునునితో)
    మోహమ్ము వలదు వైరా
    రోహమ్మున నిలచి యిటుల స్రుక్కుట తగునే
    ద్రోహులశిక్షించగ సం
    దేహము విడనాడి చూడు ధీరత్వమునన్!!!
    వైరారోహము = యుద్ధము

    ఓ హేమసుతా!నీ సం
    దేహము విడనాడిచూడు ధీరత్వమునన్
    మోహము తొలగిన రాముని
    సౌహార్థము నెఱుగగలవు సద్గుణశీలా!!!
    (వాల్మీకి సీతతో..)

    ప్రత్యుత్తరంతొలగించు
    ప్రత్యుత్తరాలు
    1. శైలజ గారూ,
      మీ రెండు పూరణలు బాగున్నవి. అభినందనలు.

      తొలగించు
  24. దేహము తానని భ్రమయుచు
    దేహీయని ప్రాకులాడి దీనత్వమునన్
    హాహాకారము జేయక
    దేహము విడనాడి చూడు ధీరత్వమునన్!

    దేహ భ్రాంతిని విడచి యని!

    ప్రత్యుత్తరంతొలగించు
    ప్రత్యుత్తరాలు
    1. సీతాదేవి గారూ,
      మీ పూరణ బాగున్నది. అభినందనలు.

      తొలగించు
    2. ధన్యవాదములు గురిదేవా! నమస్సులు!🙏🙏🙏🙏

      తొలగించు

  25. అర్జునుడు - కృష్ణుడు

    ఆహాకారములన్ గనన్ కుదరదయ్యా!నేనశక్తుండ! నే
    నీ హాంత్రమ్ముల చూడలేను విడుతున్నీరంగమున్నిప్పుడే!
    సాహాయ్యంబగుదున్!కిరీటి!నెఱియౌ సారంగమున్బట్టి,సం
    దేహమ్మున్ విడనాడి చూడుము సఖా ధీరత్వమేపారగన్ !

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. Dr.nvnchary
      మోహమ్మున్ విడనాడు పార్థ! కలయే ముందున్న బంధమ్ములున్
      స్వాహాజేసిరిమీదు రాజ్య సుఖముల్ వారేమి నీసొంతమా
      నీహారమ్ము వలెన్ కరుంగు నిది నా నీమంపు భ్రాంతిద్ది సం
      దేహమ్మున్ విడనాడి చూడుముసఖా ధీరత్వమేపారగన్

      తొలగించు
    2. జిలేబీ గారూ,
      మీ పూరణ బాగున్నది. అభినందనలు.
      ***************
      డా. ఎన్వీయెన్ చారి గారూ,
      మీ పూరణ బాగున్నది. అభినందనలు.

      తొలగించు
  26. దేహముపై నజ్ఞానపు
    మోహమునే విడిచి చూడుము మరియును జగ
    న్మోహనునే మది దలచుచు
    దేహము విడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. జనార్దన రావు గారూ,
      మీ పూరణ బాగున్నది. అభినందనలు.

      తొలగించు
  27. సాహంకారులుగౌరవు
    లాహవరంగంబునందు హతునిగ జేయన్
    మోహమునొందక యునుసం
    దేహము విడనాడిచూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. సుబ్బారావు గారూ,
      మీ పూరణ బాగున్నది. అభినందనలు.

      తొలగించు


  28. ఓహో నేనే యనకోయ్!
    దేహము విడనాడి చూడు, ధీరత్వమున
    న్నీ హర్మ్యంబునట జిలే
    బీ, హాంకారములు నిన్ను విడి కల తొలగున్!

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. జిలేబీ గారూ,
      మీ పూరణ బాగున్నది. అభినందనలు.

      తొలగించు


  29. ఓహోనాదని నీదనన్ జగడముల్ కొట్లాటలేలా ! భళా
    దేహమ్మున్ విడనాడి చూడుముసఖా ధీరత్వమేపారగన్
    నీహర్మ్యంబెట? నీశుడేల నినుతన్నీరమ్ముగాజేసెనో?
    సోహంబో మరి హంసవో? యెరుకయెన్? శోభిల్ల మార్గంబెటన్?

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. జిలేబీ గారూ,
      మీ పూరణ బాగున్నది. అభినందనలు.
      మొదటి పాదంలో యతి తప్పింది. సవరించండి.

      తొలగించు
  30. రాహువు,కేతువు బట్టిన
    సాహసమున యెదురునిలచి సాగెడిరవిలా
    బాహటముగచుట్టిన?సం
    దేహమువిడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. ఈశ్వరప్ప గారూ,
      మీ పూరణ బాగున్నది. అభినందనలు.
      'వలె' అనే అర్థంలో 'లా' అనడం సాధువు కాదు. "సాగెడి రవియై" అనండి.

      తొలగించు
  31. .
    దేహము నాత్మల హంస
    స్సోహమనెడి నాటకమును చూచెదరిలలో
    మోహాంబుధి దాటుటకై
    దేహము విడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. మల్లేశ్వర్ గారూ,
      మీ పూరణ బాగున్నది. అభినందనలు.

      తొలగించు
  32. రాహుల్ గాంధి సిద్ధరామయ్యతో:

    ఓహో! కన్నడ సిద్ధరామ! కనుమా! ఊహించ లేవీవు గా!
    సాహో! కాంగ్రెసు నేత నేను! వినుమా! సాఫల్యమొందున్ గ! నే
    రాహుల్ గాంధిని!!! నేను గెల్చెదనురా! రాకాసి మోడీని! సం
    దేహమ్మున్ విడనాడి చూడుము సఖా ధీరత్వ మేపారఁగన్!

    ప్రత్యుత్తరంతొలగించు
    ప్రత్యుత్తరాలు


    1. ఈశార్దూలముకైన రాహులుడటన్ గెల్వంగ మేలౌ భళా :)

      తొలగించు
    2. ప్రభాకర శాస్త్రి గారూ,
      మీ పూరణ బాగున్నది. అభినందనలు.

      తొలగించు


    3. 🙏🙏🙏

      ............


      జిలేబీ గారూ:
      మీ శార్దూల పాద పద్మము బాగున్నది. యతి సవరించండి.

      తొలగించు
    4. సమయానుకూలమైన పూరణ... శ్రీ శాస్త్రి గారూ... అభినందనమందారమాల 💐👏👏🙏🙏


      ఓహో... సాహో... రాహుల్...భలే పదాల విందు....

      రాహుల్ గాంధికి పంపిన
      సాహో ! యను పూరణమును చదివిన ., మోదీ
      ద్రోహంబని భావించిన
      నో హోహో యందు నేను నుత్సాహముతో !!

      .... మురళీకృష్ణ

      తొలగించు
    5. తెలంగాణ మాండలికంలో ’ఈ’ ని ...’గీ’ అంటే సరి జిలేబీ గారూ... మీ యతిభంగదోషం పలాయనం చిత్తగిస్తుంది!

      తొలగించు

    6. ఇవ్వాళ యతి మహోదృతంగా పడినట్టుంది కందంలోనూ శార్దూలాలలోనూ :)

      నెనరులు సవరణలకు

      జిలేబి

      తొలగించు
  33. స్నేహితులను సంబంధుల
    నాహా దూరమున నుంచు నక్కట నీ వి
    త్తాహంకారము, నిస్సం
    దేహము, విడనాడి చూడు ధీరత్వమునన్


    దేహత్యాగులె మన్నిమిత్తమున నీ ధీరుల్ స భీష్మాదులే
    బాహాటమ్ము నిమిత్త మాత్రుఁడవు నా వారంచు వీ రెల్లరున్
    మోహావేశముఁ బొంద నేల మది సంపూర్ణమ్ము భీభత్స సం
    దేహమ్మున్ విడనాడి చూడుము సఖా ధీరత్వ మేపారఁగన్

    ప్రత్యుత్తరంతొలగించు
    ప్రత్యుత్తరాలు
    1. కామేశ్వర రావు గారూ,
      మీ రెండు పూరణలు అద్భుతంగా ఉన్నవి. అభినందనలు.

      తొలగించు
    2. పూజ్యులు శంకరయ్యగారికి సప్రణామ ధన్యవాదములు.

      తొలగించు
  34. స్నేహితుడా తప్పిటు దా
    సోహమనుట మద్యమునకు - శుభకరమగు వ్యా
    మోహము విడ - లేదే సం
    దేహము - విడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. సూర్యనారాయణ గారూ,
      మీ పూరణ బాగున్నది. అభినందనలు.

      తొలగించు
  35. శార్దూలవిక్రీడితము(పంచపాది)

    దాహమ్మెంతయొ? గంగ నీదె తులసీదాసుండు భార్యన్గనన్!
    మోహమ్మున్విడి దైవమందు మదినే మోక్షార్థమై యుంచుచున్
    దేహమ్మున్ విడనాడి చూడుము సఖా! ధీరత్వ మేపారఁగన్ 
    సాహాయమ్మిడు దాట భౌతికమనన్ సాధ్వీమతల్లప్పుడు
    న్నూహాతీతముగన్ మహాకవిగనై యొప్పారె వాల్మీకనన్!

    ప్రత్యుత్తరంతొలగించు
    ప్రత్యుత్తరాలు
    1. సహదేవుడు గారూ,
      మీ మీ పూరణ బాగున్నది. అభినందనలు.
      'తల్లి + అప్పుడు, వాల్మీకి + అనన్' అన్నపుడు సంధి లేదు. యడాగమం వస్తుంది.

      తొలగించు
    2. గురుదేవులకు ధన్యవాదములు. సవరించిన పూరణ పరిశీలించ ప్రార్థన

      దాహమ్మెంతయొ? గంగ నీదె తులసీదాసుండు భార్యన్గనన్!
      మోహమ్మున్విడి దైవమందు మదినే మోక్షార్థమై యుంచుచున్
      దేహమ్మున్ విడనాడి చూడుము సఖా! ధీరత్వ మేపారఁగన్ 
      సాహాయ్యమ్మిడు దాట భౌతికమనన్ సాధ్వీమ బోధించఁగ
      న్నూహాతీతముగన్ మహాకవిగనై యొప్పారె ధన్యుండునై!

      తొలగించు

  36. ఆహా! రాముని నామ మెంత రుచియో యంచున్ను పాసించుచున్
    దేహమ్మున్ విడనాడి చూడుము సఖా ధీరత్వ మేపారఁగన్
    మోహావేశములం త్యజించి సతమున్ పూజించ నారాయణున్
    బాహాటమ్ముగ తానె చూపు నిలలో భవ్యంపు జీవమ్ములన్

    ప్రత్యుత్తరంతొలగించు
    ప్రత్యుత్తరాలు
    1. అన్నపరెడ్డి వారూ,
      మీ పూరణ బాగున్నది. అభినందనలు.

      తొలగించు
  37. దేహమ్మాత్మయు వేరువేరు మృతి యీ దేహమ్ముకే వీడు నీ
    మోహ మ్మగ్రజు పైన జేరెను దివమ్మున్ వాలి నీ కేల సం
    దేహ మ్మార్కి! సువత్సు నంగదుని బ్రీతిం జీరి యంత్యేష్టి కా
    దేహమ్మున్ విడనాడి చూడుము సఖా ధీరత్వ మేపారఁగన్!

    ప్రత్యుత్తరంతొలగించు
    ప్రత్యుత్తరాలు
    1. మిస్సన్న గారూ,
      మీ పూరణ వైవిధ్యంగా చక్కగా ఉన్నది. అభినందనలు.

      తొలగించు
  38. కరుక్షేత్ర సంగ్రామం లో శ్రీకృష్ణపరమాత్మ అర్జునుని తో :
    కందం
    ఆహా! నీ సుతుఁ జంపిన
    మోహమ్మే బంధువులని? మొన గీతన్ సో
    దాహరణముగ వినుచు సం
    దేహము విడనాడి చూడు ధీరత్వమునన్

    ప్రత్యుత్తరంతొలగించు
  39. ఆహా యెంతటి సుందరాంగుడవు నాయందమ్ము నీకే సుమా
    మోహమ్మెంతయొ గల్గె నిన్ గనగనే మోదమ్ముతో జే రగన్
    బాహుద్వందము జాచితిన్ బ్రవర నా ప్రాణేశ్వరా వేగ సం
    దేహమ్మున్ విడనాడి చూడుము సఖా ధీరత్వమే పారఁగన్.

    ప్రత్యుత్తరంతొలగించు
  40. మోహము చే గద నిట వై
    దేహిని చాటుగను పట్టి తెచ్చితివిగదా!
    యా హరి యే రాముడు సం
    దేహము విడనాడి చూడు ధీరత్వమునన్

    ప్రత్యుత్తరంతొలగించు
    ప్రత్యుత్తరాలు
    1. విరించి గారూ,
      మీ రెండు పూరణలు బాగున్నవి. అభినందనలు.

      తొలగించు
  41. గు రు మూ ర్తి ఆ చా రి
    ,,,,,,,,,,,,,,,,,,,,,,,,,,, ,,,,,,,,,,,,,,,,



    సౌహార్దమ్ము బరిత్యజించుచు పరైశ్వర్య ప్రలోభాత్మ చే

    ద్రోహాలోచన చేయ నేల ? ధన మీ లోకమ్మునన్ శాంతిదం

    బే ? హేవాకధనంబు బొందు మిక , సిధ్ధించున్ గదా ముక్తి | సం

    దేహమ్మున్ విడనాడి చూడుము సఖా | ధీరత్వ మేపారగా

    నూహాతీతు - ననంతు - నచ్యుతుని నీ యుల్లమ్మునన్ నమ్మినన్

    సాహాయ్యం బొనరించు నీ కొసగుచున్ సంక్షేమమున్ నిత్యమున్


    { హేవాక ధనము = ఙ్ఞాన ధనము ; చూడుము సఖా = యోచింపుము

    సఖా }

    ప్రత్యుత్తరంతొలగించు
    ప్రత్యుత్తరాలు
    1. గురుమూర్తి ఆచారి గారూ,
      మీ పూరణ ప్రశస్తంగా ఉన్నది. అభినందనలు.

      తొలగించు


  42. సౌహార్ద్రంబును చేగొనంగ వలయున్ సాంగత్యముల్మేలవన్
    మోహంబేలర?మానవా! బతుకునన్ మొండించుమా కోరికల్
    సాహోరేయనజీవితమ్ము జనుడా సాధింపుమానీహృదిన్
    దేహమ్మున్ విడనాడి చూడుము సఖా ధీరత్వమేపారగన్

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. జిలేబీ గారూ,
      మీ పూరణ బాగున్నది. అభినందనలు.

      తొలగించు
  43. వాహనము నడుపగనె నీ
    దేహమునకు కీడు కల్గి తీరునటంచున్
    యాహార్యము మార్చక సం
    దేహము విడనాడి చూడు ధీరత్వమునన్!

    ప్రత్యుత్తరంతొలగించు
    ప్రత్యుత్తరాలు
    1. శ్రీధర రావు గారూ,
      మీ పూరణ బాగున్నది. అభినందనలు.
      'అటంచున్ + ఆహార్యము' అన్నపుడు యడాగమం రాదు.

      తొలగించు
  44. శుక్రాచార్యునితో బలిచక్రవర్తి

    సాహాయ్యమ్మును గోరి నీవటువు మాసామ్రాజ్య మేతెంచగా
    నాహా! మూడడుగుల్ వసుంధరను తానాశించె ,నీయంగ సం
    దేహమ్మున్ విడనాడి చూడుము సఖా! ధీరత్వమేపారగా
    నూహించన్ నతడచ్యుతుండనగ నుత్సాహంబు హెచ్చాయగా!

    ప్రత్యుత్తరంతొలగించు
    ప్రత్యుత్తరాలు
    1. సీతాదేవి గారూ,
      మీ పూరణ బాగున్నది. అభినందనలు.
      '..గోరి యీవటువు' అనండి. 'హెచ్చెంగదా' అనండి.

      తొలగించు
  45. దేహము భోగాస్పదమై

    మోహాది గుణము లకాత్మ మూలంబయ్యెన్ ;

    ఐహిక ములనా శింపక.

    దేహము విడనాడి చూడు ధీరత్వము నన్:

    విద్వాన్, డా!! మూలె. రామమునిరెడ్డి. ప్రొద్దుటూరు. కడప జిల్లా, 7396564649.

    ప్రత్యుత్తరంతొలగించు
    ప్రత్యుత్తరాలు
    1. రామముని రెడ్డి గారూ,
      మీ పూరణ బాగున్నది. అభినందనలు.

      తొలగించు
  46. *6.5.18*
    ..............🌻శంకరాభరణం🌻...............
    .. .. .. .. .. .. 🤷🏻‍♂సమస్య🤷‍♀.. .. .. .. .. .. ..
    "దేహము విడనాడి చూడు ధీరత్వమునన్"

    సందర్భము: దేహము విడువడం తొడుగడం అనేవి చొక్కా వేసుకొనడం విప్పేయడం లాంటివే! పెద్ద కష్టమైన విషయా లేమీ కావు.
    ఎవరికంటే దేహ భ్రాంతి నశించిన వానికి..
    ~ ~ ~ ~ ~ ~ ~ ~ ~~ ~ ~ ~ ~ ~ ~ ~
    మోహము నశించినంతనె
    యాహా! యంతటను నీవె!
    యది యొక చొక్కా
    యే! హాయి విడుట.. తొడుగుట..
    దేహము విడనాడి చూడు ధీరత్వమునన్

    2 వ పూరణము..

    సందర్భము: మనకెన్నో జన్మ లున్నాయి. జన్మ జన్మకూ ఒక దేహం దేవు డివ్వాల్సిందే! అందువల్ల మనకు దేహా లెన్నో వున్నాయి. దేహం మారినపుడల్లా భార్య పిల్లలూ మారుతూనే వుంటారు. ఇది అవగాహనకు వస్తే నరుడు ధీరు డౌతున్నాడు.
    ఈ దేహమే నే ననుకొన్నవాడు మోహంలో మునిగి గిలగిలా కొట్టుకుంటూనే వుంటాడు. అనుకోనివాడు స్వేచ్ఛగా వుంటాడు. దేహం పోతే పోనీలే అనుకుంటాడు.
    వాడే ధీరుడై దేహాన్ని విడనాడగలడు. ధరించగలడు కూడ.
    ~ ~ ~ ~ ~ ~ ~ ~ ~~ ~ ~ ~ ~ ~ ~ ~
    దేహము నే నని తలచిన
    మోహము కమ్ముకొని కొంప ముంచును; కాదేన్
    దేహము లెన్నో నీ, కొక
    దేహము విడనాడి చూడు ధీరత్వమునన్

    3 వ పూరణము..

    సందర్భము: దేనినీ లక్ష్యపెట్టకుండా (నిర్లక్ష్యంగా) వుండేవాడే లోకంలో సుఖపడు తాడు. వాని కేదీ అడ్డు రాదు.
    ఇందులో సందేహానికి తావు లేదు.
    ~ ~ ~ ~ ~ ~ ~ ~ ~~ ~ ~ ~ ~ ~ ~ ~
    "పో! హే! పో!" యను నిర్ల
    క్ష్యోహా ప్రియుడే సుఖించు; నొక్కటియును న
    డ్డై హానిఁ జేయునే! సం
    దేహము విడనాడి చూడు ధీరత్వమునన్

    🖋~డా.వెలుదండ సత్యనారాయణ

    ప్రత్యుత్తరంతొలగించు
    ప్రత్యుత్తరాలు
    1. డా. వెలుదండ వారూ,
      మీ మూడు పూరణలు అద్భుతంగా ఉన్నవి. అభినందనలు.

      తొలగించు
  47. కాలమున తానై పుట్టినది కాలములోనే
    కనుమరుగౌనది
    పాంచభౌతికమౌ దేహమిది కట్టెగ కాలి
    బూడిదై చనునది
    నేను దేహమను అహంకారమున తమమదె
    నిను ఊయలూపగన్
    దేహమ్మున్ విడనాడి చూడుము సఖా
    ధీరత్వమేపారగన్
    6-5-2018

    ప్రత్యుత్తరంతొలగించు
  48. [5/6, 1:02 PM] Dr Umadevi B: డా.బల్లూరి ఉమాదేవి.

    6/5/18

    ఆహవ రంగము నందున

    మోహంబదియేలపార్థ ముందుగ విడుమా

    సాహాయము చేతును సం

    దేహము విడనాడి చూడు ధీరత్వమునన్.


    మోహంబును విడనాడుము

    సాహసమేచూపుమయ్య సమరమునందున్

    దేహమశాశ్వత మనుచు

    దేహము విడనాడి చూడు ధీరత్వమునన్.


    దేహము స్థిరమా? కాదే!

    మోహము వీడగ కలుగును మోక్షము పార్థా

    నాహంకర్తాయని సం

    దేహము విడనాడి చూడు ధీరత్వమునన్.


    దేహము గేహము లన్నియు

    మోహము పెంచెడి వనుచును మోహము తోడన్

    న్నూహలలోబ్రతుకక సం

    దేహము విడనాడి చూడు ధీరత్వమునన్.

    ప్రత్యుత్తరంతొలగించు