8, మార్చి 2011, మంగళవారం

సమస్యా పూరణం - 248 (ఆడువారిని తన్నుటే)

అంతర్జాతీయ మహిళా దినోత్సవ శుభాకాంక్షలు
కవి మిత్రులారా,
ఈ రోజు పూరించ వలసిన సమస్య ఇది ......
ఆడువారిని తన్నుటే న్యాయ మగును.

21 కామెంట్‌లు:

  1. గోలి హనుమచ్ఛాస్త్రి.

    బ్రతుకు తెరువుకు వచ్చిన పడతుల తన
    అమ్మ, చెల్లాయి,అక్కయ్య,నాత్మ మరచి
    ఆట బొమ్మగ భావించి అమ్ము కొనుచు
    ఆడువారిని; తన్నుటే న్యాయ మగును.

    రిప్లయితొలగించండి
  2. మంత్రిప్రగడ వేంకట బాలసుబ్రహ్మణ్యంమంగళవారం, మార్చి 08, 2011 8:51:00 AM

    శాస్త్రి గారూ,
    ఆడవారిని ఏడిపించి 'ఆడు'కొనే వారిని తన్నుట అనడం చాలా బాగుంది.
    అమ్ముకొనే వారినే కాదు, కొనే వారినీ కలిపి తన్నాలి.
    - మంత్రిప్రగడ వేంకట బాలసుబ్రహ్మణ్యం

    రిప్లయితొలగించండి
  3. గోలి హనుమచ్ఛాస్త్రి.

    మంత్రి ప్రగడ గారూ!ధన్యవాదములు. మీ సూచనపై చిన్న సవరణ తో!

    బ్రతుకు తెరువుకు వచ్చిన పడతుల తన
    అమ్మ, చెల్లాయి,నక్కయ్య,నాత్మ మరచి
    అమ్ము వారిని కొనువారి, నబలలనుచు
    ఆడు వారిని; తన్నుటే న్యాయ మగును.

    రిప్లయితొలగించండి
  4. జనుల నాకాంక్ష లన్నింటి జటిల పరచి
    పూట పూటకో తీరుగా మాట మార్చి
    నటునిటులదిప్పి కపటపు నాట కముల
    నాడు వారిని తన్నుటే న్యాయమగును!!!

    రిప్లయితొలగించండి
  5. మంద పీతాంబర్ గారూ , మీ పద్యం చాలా బాగుంది . హృదయపూర్వక అభినందనలు . సమస్య చూడగానే నాకు తోచిన పూరణ ఇదే....అయితే ' జనుల నాకాంక్ష ' అనే కంటే (అక్కడ నుగాగమం రాదు కాబట్టి ) , జనుల ఆకాంక్షలన్నింటి అని విడదీయడం ఉత్తమంగా ఉంటుంది కదా . జనుల కోర్కెలన్నింటిని అని కూడ అనుకోవచ్చు !!!!

    రిప్లయితొలగించండి
  6. కన్న తల్లికి పట్టె డన్నము నిడ బోక
    ........బయటికి నడుపెడి భ్రష్టు డొకడు!
    కట్టు కొన్నాలిని కట్న కాన్క లటంచు
    ....... కర కర నమిలెడు కటిక యొకడు!
    ప్రేమ యెరను జూపి వేధించి, కాదన
    ....... కాల్చి చంపగ బూను కాలు డొకడు!
    బంగరు బొమ్మల నంగడిలో బెట్టి
    ........వెల కట్టి యమ్మెడు విటు డొకండు!

    ఇట్టి త్రాష్టుల బంధించ నేళ్ళ కేళ్ళు
    కటకటాలను, మహిళల కంట నీరు
    తుడిచి నట్లగు, నతివల తోడ నాట
    లాడు వారిని తన్నుటే న్యాయ మగును.

    రిప్లయితొలగించండి
  7. అభినందించిన డా.విష్ణు నందన్ గారికి కృతఙ్ఞతలు.
    మిస్సన్న గారి పూరణ చాలా బావుంది

    బాలు టాంపరు చేసిన బోలరులను
    క్యాచు చేజార్చు ఫీల్డింగు కీచకులను
    మ్యాచు ఫిక్సింగు చేయించి మాయలాట
    లాడు వారిని తన్నుటే న్యాయ మగును !

    ( సరదాగా పూరించింది, ఎవరిని నొప్పించాలని కాదు.)

    రిప్లయితొలగించండి
  8. అందరికీ వందనములు
    అందరి పూరణలూ
    అలరించు చున్నవి !

    01)

    _______________________________________

    ఆది శక్తి స్వరూపమే - ఆడ దన్న
    ఆద రించుము అమితమౌ - ఆర్తి తోడ !
    ఆడు వారిని ! తన్నుటే - న్యాయ మగును
    అతివలకు,ఆప దొనరించు - అధము నెపుడు !
    _______________________________________

    రిప్లయితొలగించండి
  9. గోలి హనుమచ్ఛాస్త్రి గారూ,
    మంత్రిప్రెగడ వారు ప్రశంసించినట్లుగా మీ పురణ బాగుంది. అభినందనలు.

    మంద పీతాంబర్ గారూ,
    డా. విష్ణు నందన్ గారి ప్రశంసము పాతులైన మీకు అభినందనలు.
    వారి సూచనను గమనించారు కదా!
    రెండవ పురణ ప్రశతంగా ఉంది. అభినందనలు.

    మిస్సన్న గారూ,
    మీ సీసపద్యం అద్భుతంగా ఉంది. అభినందనలు.
    "కట్టుకోన్న + ఆలిని" అన్నప్పుడు యడాగమం వస్తుంది. "కట్టుకొన్న సతిని" అందాం.

    రిప్లయితొలగించండి
  10. ఈ మధ్య టీవీ లో భార్యాబాధితులు కొందరు మాట్లాడటం వార్తలలో చూశాను. ఒకటి రెండు కేసులు నిజంగా చూశాను. ఆ కారణంగా, నా పూరణ కొంచెం భిన్నంగా వుండవచ్చు. కానీ నిజాంశం వుందని మనవి చేస్తూ, ఒక బాధితుడి అంతర్వాణిలో:

    భార్య బాధింప పలుమార్లు పరుల కెరుక
    పరచ నలవిగాక, భయ కంపరములఁ బడి
    నాత్మ హత్య జేసి కొనుట కన్న యట్టి
    ఆడు వారిని తన్నుటే న్యాయ మగును.

    రిప్లయితొలగించండి
  11. చంద్రశేఖర్ గారూ,
    నా నిరీక్షిస్తున్న పూరణ మీ నుండి వచ్చింది. సంతోషం. సంతోషం ఎందుకంటే ఏం చెప్పను? (గుసగుస) నేనూ భార్యాబాధితుణ్ణే :-(

    రిప్లయితొలగించండి
  12. నా పూరణ ....

    పెద్దలను గురువుల గౌరవించకుండ
    స్త్రీలతో మరియాదను మాలి, ఖలులఁ
    గూడి నీతి సంస్కారముల్ వీడి మాట
    లాడువారిని తన్నుటే న్యాయ మగును.

    నోటు - చంద్రశేఖర్ గారికి ఉన్నంత ధైర్యం నాకు లేదు.

    రిప్లయితొలగించండి
  13. మాస్టారూ, నేను నమ్మను సార్ (నవ్వుతూ). శ్రీమతి శాంతి గారు మీకు యెంత సహకరించకపోతే మీ మదినుండి కలం (అఫ్ కోర్స్, లేఖిని అనుకోండి) ద్వారా ఆణిముత్యాల వంటి పద్యాలు జాలు వారుతున్నాయీ!

    రిప్లయితొలగించండి
  14. మిస్సన్న గారి సీసం బాగుంది, కానీ "...చంపగ బూను కాలుడొకడు" లో యతికోసం కాలుడు అన్న మాట వాడారేమో (నవ్వుతూ). అట్లాంటి వాళ్ళని యముడితో పోల్చగూడదు సార్. వాళ్ళు నీచులు. శాస్త్రాలు చదువుతున్న కొద్దీ యమధర్మరాజుమీద గౌరవం హెచ్చుతోంది. మహానుభావుడు, ఆయనే లేకపోతే మనం ఈ లోకంలో ఇట్లా బ్రతకలేము. ఏదో నా స్వగతంలోంచి వచ్చిన స్నేహ పూర్వక స్పందన...

    రిప్లయితొలగించండి
  15. వసంత్ కిశోర్ గారూ,
    అందరం "ఆడువరిని" తంతే "ఆడువారితో" తన్నించారు. బాగుంది. అభినందనలు.
    "ఆపదొనరించు"ను "ఆపద నొనర్చు" అందాం.
    ఇక్కడ ఒక సూక్ష్మవిషయాన్ని గమనించాలి.
    సమస్యలో ఉన్నది "ఆడువారు" అంటే ఆడేవాళ్ళే. స్త్రీలు అనే అర్థంలో అర్ధానుస్వారంతో "ఆఁడువారు" అని ఉంటుంది.

    రిప్లయితొలగించండి
  16. గురువు గారూ మీ పూరణ చాల బాగుంది.
    మంద పీతంబార్ గారూ ధన్య వాదాలు.
    చంద్ర శేఖర్ గారూ ధన్య వాదాలు.
    మీరన్నది నిజం. కాలుడు ధర్మ మూర్తి.
    మీ పద్యం వైవిధ్యంగా అలరారుతోంది.

    రిప్లయితొలగించండి
  17. మాస్టర్ గారూ!ధన్యవాదములు.నీతి ప్రబోధంగా సాగిన మీ పూరణ చాలా బాగుంది.యెవరెవరిని తన్నాలో సీసంలొ వివరించిన మిస్సన్న గారి పూరణ అలరించింది.యెలాటి ఆడవారిని తన్నవచ్చో చెప్పిన చంద్ర శేఖర్ గారి పూరణ విలక్షణంగా ఉంది.పీతాంబర్ గారి రెండు పూరణలు,కిశోర్ గారి పూరణలు బాగున్నవి.

    గోలి హనుమచ్ఛాస్త్రి.

    రిప్లయితొలగించండి
  18. Varaprasad from Bangalore
    తే : నేత గాంధి టోపి ధరించి నెదుట నిల్చి

    ఓటును అర్థించగా మెచ్చి ఓటు వేసి

    ప్రాణ మిచ్చిన; ఓటరు ప్రాణములతొ

    ఆడు వారిని తన్నుటే న్యాయ మగును !

    రిప్లయితొలగించండి
  19. వరప్రసాద్ గారూ,
    శంకరాభరణం బ్లాగుకు స్వాగతం.
    మీ ప్రయత్నం ప్రశంసనీయం. అభినందనలు.
    అయితే కొన్ని లోపాలు ... అవి ఔత్సాహికులైన కొత్త కవులకు సహజం. నిరుత్సాహపడకుండా పద్య రచన కొనసాగించండి. తప్పులు సవరించి దారి చూపడానికి నేనూ కవిమిత్రులూ ఉన్నాం కదా.
    మీ పద్యం మొదటి పాదంలో "ధరించి + ఎదుట" అన్నప్పుడు నుగాగమం రాదు. రెండవ పాదంలో గణదోషం ఉంది. మూడవ పాదంలో చివర "తొ" అన్నారు. అది "తో" అనే ప్రయోగించాలి. (బ్రాకెట్లలో) నా సవరణలతో మీ పద్యం.....
    నేత గాంధి టోపి ధరించి (ప్రీతి తోడ)
    ఓటు (న)ర్థించగా మెచ్చి ఓటు వేసి
    ప్రాణ మిచ్చిన; ఓటరు (బ్రతుకుతోడ)
    ఆడు వారిని తన్నుటే న్యాయ మగును !

    రిప్లయితొలగించండి