19, ఆగస్టు 2011, శుక్రవారం

సమస్యా పూరణం -430 (పచ్చకామెర్ల రోగము)

కవి మిత్రులారా,
ఈ రోజు పూరించవలసిన సమస్య ఇది ....
పచ్చకామెర్ల రోగము పాలకులకు.
ఈ సమస్యను పంపిన
కందుల వరప్రసాద్ గారికి
ధన్యవాదాలు.

15 కామెంట్‌లు:

  1. అందరికీ వందనములు !

    01)
    _______________________________

    పలుకు పలుకున నీతులే - ప్రబల మవగ
    పదవి లేనప్పుడే వారు - పలుకు చుంద్రు !
    పదవి చేజిక్క నన్నియూ - పాతకములె
    పచ్చకామెర్ల రోగము - పాలకులకు !
    _______________________________

    రిప్లయితొలగించండి
  2. పదవి మదమున సత్యమ్ము పలుకలేరు,
    కనగ జాలరు, చెవియొగ్గి వినగ లేరు
    పిచ్చి ముదిరెనో యవినీతి హెచ్చి,వచ్చె
    పచ్చ కామెర్ల రోగము పాలకులకు

    రిప్లయితొలగించండి
  3. నీతిఁ దప్పిన వారలు నేతలయిన
    తమనుఁ బోలిన వారని తలచి, పరుల
    మంచి తనమునుఁ దెలియక మసలి నారె!
    పచ్చకామెర్ల రోగము పాలకులకు.

    రిప్లయితొలగించండి
  4. భేషైన పూరణలు చేసిన మిత్రులకు అభినందనలు.
    కార్యాలయపు పని వత్తిడి మూలముగా రెండు రోజులుగా తరగతులకు హాజరు కాలేదు ....

    మంట జూడరు వెలుగుల వెంట జూచు
    పాచి జూడరు పైపైని పచ్చ జూచు
    వెచ్చ, పచ్చగ దేశమ్ము వెలుగు ననును
    పచ్చకామెర్ల రోగము పాలకులకు !

    రిప్లయితొలగించండి
  5. మీ సవరణలకు ధన్యవాదములు, నమస్కారములతో
    పచ్చకామెర్ల రోగము పాలకులకు
    నేడు, మంచిజెడులకును నేరమంట
    గట్టి, "తీహారె" మందనె ఖలులు, కూడి
    నారు సామాన్య జనులకు నడ్డి విరువ|

    రిప్లయితొలగించండి
  6. జనాళి బాధ తీర్చగాను సమ్మతించి వత్తురా
    ధనాశ తో, దురాశ తోడ ధాత్రినేల వత్తురా
    మనుష్య జన్మనెత్తినారు, మానవత్వమున్నదా
    వినాశబుద్ధితో చరించు వీరు మారనేరరా!

    రిప్లయితొలగించండి
  7. సంపత్ కుమార్ శాస్త్రిశుక్రవారం, ఆగస్టు 19, 2011 5:56:00 PM

    అక్రమార్జన చేసిరత్యాశతోటి,
    తమదు భాగ్యమ్ము గాంచి యీ ధరణి యందు
    పేదరికమిక లేదని ప్రేలుచుండ్రు,
    పచ్చ కామెర్ల రోగము పాలకులకు.

    రిప్లయితొలగించండి
  8. నీతి లేనట్టి నేతలు నిజము దేవ!
    మాయ మాటలు జెప్పేటి మంత్రు లనఘ;
    మంచి నెక్కడ గాంచును? మనసు రాదు
    పచ్చ కామెర్ల రోగము పాలకులకు.

    రిప్లయితొలగించండి
  9. వసంత కిశోర్ గారూ,
    బాగుది మీ పూరణ. అభినందనలు.
    ‘అన్నియూ’ అని వ్యావహారిక పదాన్ని ‘అన్నియున్’ అంటే ... ?
    *
    మంద పీతాంబర్ గారూ,
    మీ పూరణ ఉత్తమంగా ఉంది. అభినందనలు.
    *
    మందాకిని గారూ,
    మీ పూరణ ప్రశస్తంగా ఉంది.
    మీ పంచచామరం మనోజ్ఞంగా ఉంది. అభినందనలు.
    *
    గోలి హనుమచ్ఛాస్త్రి గారూ,
    మీ పూరణ చాలా బాగుంది. అభినందనలు.
    *
    వరప్రసాద్ గారూ,
    సమయోచితమైన పూరణ. బాగుంది. అభినందనలు.
    *
    సంపత్ కుమార్ శాస్త్రి గారూ,
    మీ పూరణ బాగుంది. అభినందనలు.
    *
    టేకుమళ్ళ వెంకటప్పయ్య గారూ,
    బాగుంది మీ పూరణ. అభినందనలు.
    ‘చెప్పేటి’ అనే వ్యావహారిక రూపాన్ని ‘చెప్పెడి’ అంటే ..?

    రిప్లయితొలగించండి
  10. లోక పాలును తెస్తిరి లోటు లేక !
    జనుల కొనుగోలు శక్తితో నినుమ డించె
    ధరలు! అయినను పాప మందురు గదయ్యొ
    ' పచ్చకామెర్ల రోగము పాలకులకు. '

    రిప్లయితొలగించండి
  11. మిస్సన్న గారూ,
    మీ పూరణ బాగుంది. అభినందనలు.

    రిప్లయితొలగించండి
  12. నా పూరణ ...

    ఎఱ్ఱబుగ్గల కారుల నెక్కి తిరిగి
    తాము వాతానుకూల సౌధముల నుండి
    "ఒహొహొ! దేశము పచ్చగా నున్న"దంద్రు
    పచ్చకామెర్ల రోగము పాలకులకు.

    రిప్లయితొలగించండి
  13. గురువుగారూ మీ పూరణ మన చిన్నప్పటి పాట ' కారులో షికారు కెళ్ళే '
    పాటను గుర్తు చేస్తూ చాలా బాగుంది.

    రిప్లయితొలగించండి
  14. గురువుగారూ, ధన్యవాదములు.
    ఒహొహొ అనిపించింది మీ పూరణ.అభినందనలు.

    రిప్లయితొలగించండి
  15. శంకరార్యా ! ధన్యవాదములు !
    మిత్రులందరి పూరణలూ ముచ్చటగా నున్నవి !

    రిప్లయితొలగించండి