శ్రీ రాంభట్ల వారి అవధానం - 2

శ్రీ రాంభట్ల పార్వతీశ్వర శర్మ గారి అష్టావధానం
12-02-2012 వ తేదీ సాయంత్రం
విశాఖపట్నం లలితానగర్ శ్రీ లలితాపీఠంలో
కవి పండిత రంజకంగా జరిగింది.
(రెండవ భాగం)

నాలుగవ అంశం:
నిషిద్ధాక్షరి: హైందవ సంస్కృతీ పరిరక్షణ

అవధాని గారి పద్యం:
గీతా సహభావంబున్
ప్రాతంచున్ వాడికూత పాడియు గాదే
భూతల మందున గాంచిన
నాతత శ్రీ కృష్ణు బోధననుసరణంబే.

అయిదవ అంశం:
న్యస్తాక్షరి - శ్రీమన్నారాయణుని వర్ణన
నిబంధనలు:
1) మొదటి పాదం 9 వ అక్షరం ' కో ' అయి ఉండాలి.
2) రెండవ పాదంలో 14 వ అక్షరం ' ద్భా ' అయి ఉండాలి.
3) మూడవ పాదంలో 14 వ అక్షరం ' oధ ' అయి ఉండాలి.
4) నాల్గవ పాదంలో 14 వ అక్షరం ' క్ష్మీ ' అయి ఉండాలి.
5) మత్తేభ వృత్తం అయి ఉండాలి.

అవధాని గారి పద్యం:
పద సీమన్ తనరారు కోమలికి సత్పక్షంబుగన్ వక్షమున్
పదునౌ తీరున ప్రేమ మీఱగను సద్భావంబు నందుంచి తా-
నదురింతైనను లేక యుండె శుభ బంధ శ్రేణిగా దెల్పి తా-
మెద నుండుంగద భక్తయూధముల లక్ష్మీ నాథులట్లున్ సదా.

ఆరవ అంశం:
ఆశువు 1 ) అవధాన సభ వర్ణన.

కవులకు నెలవై నట్టిది
నవలా శ్రీ లలిత యిచట నవ్య స్థితిలో
భువి జనులను కాపాడుచు
నవ కవితలు వెలయజేయు నాకం బిదియే.

2 ) విశాఖపట్టణ వర్ణన
వైశాఖేశ్వరు పుణ్యసీమ విలసద్వారాశి దివ్యాభయ
శ్రీ శీర్షంబయి తేజరిల్లు పురమై చిద్రూపిణీ వాసమై
రాశీభూత కళా విరాజిత సుపర్వారామమై సాహితీ
దేశంబయ్యె విశాఖపట్టణము దేదీప్యంబుగా నొప్పుచున్.

ఏడవఅంశం :
ఘంటా నాదం: లెక్క సరిగా సరిపోయింది.

ఎనిమిదవ అంశం:
అప్రస్తుత ప్రసంగం: అవధాని ప్రతి ఆటంకానికీ చిరునవ్వుతో స్పందించారు.

**************** అష్టావధానం సమాప్తం. *****************
అవధాన విశేషాలను పంపించిన ‘మిస్సన్న’ గారికి ధన్యవాదాలు.