25, డిసెంబర్ 2012, మంగళవారం

సమస్యా పూరణం - 917 (భోగరక్తుఁడె మేటి)

కవిమిత్రులారా,
ఈరోజు పూరించవలసిన సమస్య ఇది ...
భోగరక్తుఁడె మేటి బైరాగి యగును.
ఈ సమస్యను సూచించిన కవిమిత్రునకు ధన్యవాదములు.

13 వ్యాఖ్యలు:

  1. భోగ మానంద దాయకము కద యెపుడు
    నాదరమ్మున భగవాను నర్చనమ్ము
    ధ్యానమును జింతనములను నఖిల యోగ
    భోగరక్తుడే మేటి బైరాగి యగును

    ప్రత్యుత్తరంతొలగించు
  2. యోగులకు యోగి యమ్మహాయోగి యనగ
    యోగి హృదయకమలవాసి యోగివిభుడు
    భోగమే యతనికి శయ్య మోక్షదాయి
    భోగరక్తుడే మేటిబైరాగి యగును

    ప్రత్యుత్తరంతొలగించు
  3. భోగ రక్తుడె మేటి బైరాగి యగును
    నిజము ముమ్మాటి కీ వార్త , నిగమ శర్మ
    భోగముల దేలి చివర బై రాగి యయ్యి
    యాకు లలములు దిన సాగె నడవి లోన

    ప్రత్యుత్తరంతొలగించు
  4. నేటి నేతల తీరిది నీతి వీడి
    ప్రజల దోచెడి యనువైన పదవి బొందు
    భోగరక్తుడే మేటి! బైరాగి యగును
    నీతిమంతుడు ధరలోన చేత గాక.

    ప్రత్యుత్తరంతొలగించు
  5. భోగియై వేమన పిదప యోగియయ్యె
    పుండరీకుడు సైతము భోగి మునుపు
    భోగములశాశ్వతములను బుద్ధి గలుగు
    భోగ రక్తుఁడె మేటి బైరాగి యగును

    ప్రత్యుత్తరంతొలగించు
  6. తోపెల్ల బాల సుబ్రహ్మణ్య శర్మడిసెంబర్ 25, 2012 1:17 PM

    జ్ఞాన భక్తి యోగ పథ విజ్ఞాన మరసి
    సాధనంబున హఠ యోగ సార మెరిగి
    మనమున సదా చిదానంద మనెడి భావ
    భోగ రక్తుడె మేటి బైరాగి యగును.

    ప్రత్యుత్తరంతొలగించు
  7. సవరణ :

    యోగులకు యోగి యమ్మహాయోగి యనగ
    యోగి హృదయకమలవాసి యోగివిభుడు
    భోగమే శయ్య వానికి ; పుట్టువటుడు
    భోగరక్తుడే మేటిబైరాగి యగును

    భోగము = పాము శరీరము , పాము పడగ

    ప్రత్యుత్తరంతొలగించు
  8. ఈనాటి అందరి పూరణలు చాల బాగుగ నున్నవి. అందరికీ శుభాశీస్సులు. అభినందనలు. స్వస్తి.

    ప్రత్యుత్తరంతొలగించు
  9. మనమునందున నిత్య ముమాపతిన్ వి
    శుద్ధ భావంబుతోడుత స్నిగ్ధభక్తి
    నిలిపి, పరిపరి జపియించు నిశిత నియమ
    భోగరక్తుడే మేటి బైరాగి యగును!!

    ప్రత్యుత్తరంతొలగించు
  10. "భోగరక్తుఁడె మేటి బైరాగి యగును
    వ్యర్థ జీవి, భోగములున్న బాగుబాగు."
    భోగముల పైని తీరని రాగము గల
    వారి భావన లివి యని పలుకవచ్చు.

    ప్రత్యుత్తరంతొలగించు
  11. ధర్మ నిరతిని వీడి యధర్మ మందు
    మదివి కారము నొందిన మాయ లోన
    తినగ తినగను గారెలు తిక్త మవగ
    భోగ రక్తుఁ డె మేటి బైరాగి యగును

    ప్రత్యుత్తరంతొలగించు




  12. భోగరక్తుడె మేటి బైరాగియగును
    విషయరక్తుడై భోగించి వెగటు పుట్టి
    యాత్మశోధనచేత దుదకహమ్మువీడి
    భోగియైనవాడె కడకు యోగి యగును.

    ప్రత్యుత్తరంతొలగించు
  13. ఈనాటి సమస్యకు వచ్చిన పూరణలన్నీ గొప్పగా ఉన్నాయి. ఇంత చక్కని పూరణలను అందించిన కవిమిత్రులు....
    పండిత నేమాని వారికి,
    నాగరాజు రవీందర్ గారికి,
    సుబ్బారావు గారికి,
    మిస్సన్న గారికి,
    సహదేవుడు గారికి,
    తోపెల్ల బాల సుబ్రహ్మణ్య శర్మ గారికి,
    అష్టావధాని రాంభట్ల పార్వతీశ్వర శర్మ గారికి,
    లక్ష్మీదేవి గారికి,
    రాజేశ్వరి అక్కయ్య గారికి,
    కమనీయం గారికి,
    అభినందనలు, ధన్యవాదములు.
    *
    రాంభట్ల వారూ,
    రెండవ పాదంలో యతి?

    ప్రత్యుత్తరంతొలగించు