19, జులై 2010, సోమవారం

సమస్యా పూరణం - 42

కవి మిత్రులారా!
ఈ రోజు పూరించ వలసిన సమస్యను రవి గారు పంపారు. ( క్రొత్తది కాదు, ప్రాచీనమూ, ప్రశస్త మైనదే ) అది ఇది.
నానాటికి తీసికట్టు నాగంభొట్లూ!

18 కామెంట్‌లు:

  1. ఏనాటికైన సీటును
    తానే కైవసము సేయ తలపులు కలుగన్
    పూనెను బాబుకు బాబ్లీ
    నానాటికి తీసికట్టు నాగంభొట్లూ!

    రిప్లయితొలగించు
  2. హరి దోర్నాల గారూ,
    సమయోచితమైన పూరణ. బాగుంది. అభినందనలు.

    రిప్లయితొలగించు
  3. ఏ నాటిది మన ధర్మము
    ఈ నాటికి విలువలన్ని ఏ మాయెనహో
    నానారీతులు వెలయగ
    నానాటికి తీసికట్టు నాగంభొట్లూ!


    నానా గడ్డిని నెసవుచు
    పోనాడిరి దేశ భవిత పోకిరి శేతల్
    ఏనాటిదొ భరత యశము
    నానాటికి తీసికట్టు నాగంభొట్లూ!

    రిప్లయితొలగించు
  4. నా పూరణలు -
    (1)
    నానా బాధలు పడి దే
    శానికి తెచ్చిరిదె ఘనులు స్వాతంత్ర్యంబున్
    కాని ఫలిత మేమున్నది?
    నానాటికి తీసికట్టు నాగంభొట్లూ!
    (2)
    ఏనాడుండునొ తద్దిన
    మానాడే కడుపు నిండు; నదె వారమయెన్
    నేనిన్నాళ్ళుగ పస్తులు
    నానాటికి తీసికట్టు నాగంభొట్లూ!
    ( "ఎద్దినం తద్దినం నాస్తి, తద్దినం మమ తద్దినం" గుర్తుకు వచ్చి )

    రిప్లయితొలగించు
  5. అస్తమాను పూజలతో పొద్దుపుచ్చే ఓ ఇల్లాలితో మొగుడు.

    ఈనాడైనా దయతో
    రానే రావా సరసకు రంగాజమ్మో
    ఈ నా కాపుర మెందుకు?
    నానాటికి తీసికట్టు నాగంభొట్లూ.

    ఓ సినిమా చూస్తూంటే ఈ ఆలోచన వచ్చింది.

    రిప్లయితొలగించు
  6. ఈనాటి కీచకుల పరిమార్చుట
    ఏనాటికైన జరుగునె మనకిక ఏమఱుపాటున్
    రానేరదు వమ్మిక యాశలు
    నానాటికి తీసికట్టు నాగంబొట్లూ !

    రిప్లయితొలగించు
  7. శంకరయ్య గారు,
    2వ పద్యంలో పొరపాటుగా టైప్ చేయడం జరిగింది. దానిని

    నెసవుచును 'మెసవుచు' అని, శేతల్ ను 'నేతల్' గా చదవగలరు.

    రిప్లయితొలగించు
  8. (నాగంభొట్లు భార్య తన భర్త పేదరికాన్ని ఎద్దేవ చెస్తూ పలికిన మాటలు)

    కానగ గతి మీకింకన్
    మా నానిచ్చిన నవీన మధుపర్కంబుల్
    మానము కాచు సభలలో
    నా నాటికి తీసికట్టు నాగంభొట్లూ!

    (సభలలోన్ + ఆ నాటికి = సభలలోనానాటికి)

    రిప్లయితొలగించు
  9. అందరికీ వందనములు !
    అందరి పూరణలూ అలరించు చున్నవి !

    ఒక యిల్లాలి వేదన :
    01)
    _____________________________________

    నానాటికి ధరలు ,పెరిగె
    ఈ నాటికి బత్తె మదియె - యిదివరకు వలే !
    ఖానా పీనాలు ,తుదకు
    నానాటికి తీసికట్టు - నాగంభొట్లూ!
    _____________________________________

    రిప్లయితొలగించు
  10. వసంత కిశోర్ గారూ,
    బాగుంది మీ పూరణ. అభినందనలు.
    రెండవపాదం చివర ‘వలెన్’ అందాం.
    ఈ సమయంలో నిద్రపోకుండా ఏం జేస్తున్నారు? మొన్ననే కదా చెప్పింది ఆరోగ్యం జాగ్రత్త అని!

    రిప్లయితొలగించు
  11. శంకరార్యా ! ధన్యవాదములు !
    ఈ సమయంలో మీరు ?????

    రిప్లయితొలగించు
  12. ఆనాడు నారు జాములు
    ఈనాడును జూడ వీరు నేడును జాముల్
    యేనాడు నిద్ర వోదురొ
    నానాటికి తీసికట్టు నాగంభొట్లూ !

    రిప్లయితొలగించు
  13. నరసింహ మూర్తి గారూ,
    మా నిద్రాలేమిని గురించి మంచి పద్యం చెప్పారు. ధన్యవాదాలు. వసంత కిశోర్ గారికి అలవాటే కాని మా బావగారు ట్రయిన్ దిగి ఆ సమయంలో వచ్చారు. ఆయనతో మాట్లాడుతూ ఒకసారి మెయిల్ చెక్ చేద్దామని నెట్ ఓపెన్ చేసాను. అంతే!

    రిప్లయితొలగించు
  14. మూర్తీజీ ! నన్నే వెక్కిరిస్తారా ! అదీ చందోబద్దంగా !
    ఉండండి మీ పని జెప్తాను !

    రిప్లయితొలగించు
  15. శంకరార్యా ! కిషోర్ జీ ! మీరు నిద్రమానుకొని శంకరాభరణానికి మెరుగులుఅద్దుతున్నారు.. ఆరోగ్యం జాగ్రత్త సుమా !
    ----------------------------------------------------------------------------
    మానాన్నే ఆరోగ్యము
    గానుండుట కొరకు తెస్తి గా తాయెత్తున్
    ఈ నాడే, చూడు బాగగు
    నా నాటికి; తీసికట్టు నాగంభొట్లూ!

    రిప్లయితొలగించు
  16. గోలి హనుమచ్ఛాస్త్రి గారూ,
    నాగంభొట్లవారికి కట్టుకొనడానికి తాయెత్తు తెచ్చిన మీ పూరణ వైవిధ్యంగా ఉండి అలరించింది. అభినందనలు.

    రిప్లయితొలగించు
  17. కిశోర్ జీ రోజుకి కనీసము ఐదారు గంటలైనా పడుకొండి సామీ ! మా వైద్యులకైతె తప్పదు రాత్రంతా ఫోను కాల్స్ తో నిద్రా భంగం. మీరు హాయిగా బజ్జో వచ్చు కదా ! పోనీ ఈ మెయిల్లో ఫోను నంబరియ్యండి . వారాంతములో మీ కనువైన సమయములో పిలుస్తాను. సరదాగా కొద్ది సేపు మాట్లాడు కొందాము.

    రిప్లయితొలగించు
  18. ఆ నాడొక సాగరమిది
    కోనేరయి క్రుంగి క్రుంగి గుంటగ మారెన్
    దీనుడు హుసేనుదిచటన్
    నానాటికి తీసికట్టు నాగంభొట్లూ!

    రిప్లయితొలగించు