5, జనవరి 2013, శనివారం

సమస్యా పూరణం - 928 (బాలుఁడు భండనమునందు)

కవిమిత్రులారా,
ఈరోజు పూరించవలసిన సమస్య ఇది ...
బాలుఁడు భండనమునందు వైరులఁ గూల్చెన్.

25 కామెంట్‌లు:

  1. శైలసుతాత్మజుడు మహా
    కాలప్రేరేపితుండు స్కందుడు బల్మిన్
    కాలాగ్ని సన్నిభుండై
    బాలుడు భండనమునందు వైరుల గూల్చెన్

    రిప్లయితొలగించండి
  2. నీలపు కాయుడు రాముఁడు
    లీలగ నెక్కుడు శరమ్ములేయుచు దానే
    కాలుని వలె చెలరేగుచు
    బాలుఁడు భండనమునందు వైరులఁ గూల్చెన్.

    రిప్లయితొలగించండి
  3. తోపెల్ల బాల సుబ్రహ్మణ్య శర్మశనివారం, జనవరి 05, 2013 8:17:00 AM

    విలుకాడయి విశ్వామి
    త్రులయా గముగా వనేగి, రోషా ర్ణవకీ
    లలజూచుచు రణ రాముడు
    బాలుఁడు భండనమునందు వైరులఁ గూల్చెన్.

    రిప్లయితొలగించండి
  4. కాలికి తగులగ బొంగర-
    మాలేమకు, మందలింప, నంతను దీటై
    వాలెను తండ్రికి తోడుగ
    బాలుడు భండనమునందు వైరుల గూల్చెన్

    (బాలచంద్రుడు)

    రిప్లయితొలగించండి
  5. శ్రీ తోపెల్ల శర్మ గారూ! శుభాశీస్సులు.
    మీకు ప్రాస నియమము గురించి అవగాహన లేనట్టుంది. ఇచ్చిన సమస్యలో ప్రాస అక్షరమునకు ముందు దీర్ఘ అక్షరము ఉన్నది కాబట్టి అన్ని పాదములలో ప్రాసకు ముందు అక్షరము దీర్ఘమే అయి యుండవలెను. స్వస్తి.

    రిప్లయితొలగించండి
  6. శ్రీ తోపెల్ల శర్మ గారూ!
    శుభాశీస్సులు.
    రోషార్ణవ కీలలు అనే మీ ప్రయోగము బాగులేదు. అర్ణవము అంటే సముద్రము కదా. సముద్రములో కీలలు (మంటలు) అనుట ఉచితము కాదు అని నా భావము. బడబాగ్ని కూడా సముద్రము లోలోననే ఉంటుంది కానీ బయటకు మంటలుగా రాదు. స్వస్తి.

    రిప్లయితొలగించండి
  7. తోపెల్ల బాల సుబ్రహ్మణ్య శర్మశనివారం, జనవరి 05, 2013 9:14:00 AM

    శ్రీపండితులవారికి నమస్సులు.ప్రాసపూర్వాక్షరము దీర్ఘమన్నది గమనించక పద్యంవ్రాయాలన్నతొందరలో జరిగిన తప్పు.మీ సూచనే సమంజసము. పునః ప్రయత్నము చేసెదను. దోషముతెల్పి, సూచనలిచ్చినందులకు శతథా ధన్యవాదములు.

    రిప్లయితొలగించండి
  8. మాలిమి తనయుఁడు దశరథుఁ
    బాలిటి పెన్నిధిగ నలరు పాపఁడు , భళిరా!
    లీలగ పదారు నిండని
    బాలుఁడు భండనమునందు వైరులఁ గూల్చెన్.

    రిప్లయితొలగించండి
  9. తాలిమి తనువై వెలయగ
    పాలసులకు వెఱవడయ్యె ప్రహ్లాదుండున్
    లాలిత గుణములు మెఱయగ
    బాలుడు భండనమునందు వైరుల గూల్చెన్

    ( వైరులు = అరిషడ్వర్గము )

    రిప్లయితొలగించండి
  10. ఆలపు విద్యలు నేర్వగ
    బాలుడు శ్రీ రామ చంద్రు డాతత రక్తిన్
    హేళన జేయగ కుమతులు
    బాలుడు భండనము నందు వైరుల గూల్చెన్ .

    రిప్లయితొలగించండి
  11. తోపెల్ల బాల సుబ్రహ్మణ్య శర్మశనివారం, జనవరి 05, 2013 12:34:00 PM

    శ్రీ పండితులవార్కి నమస్సులతో పునః ప్రయత్నముగా

    వాలాయముగ యాగపు
    శాలల సురులాక్రమింప సంరక్షకుడై
    కోలన్ క్రోధజ్వాలన్
    బాలుడు భండనమునందు వైరుల గూల్చెన్

    రిప్లయితొలగించండి
  12. వేళయిదేనని కౌరవ
    గూళులు వ్యూహంబుఁబన్న కూన కుపితుడై
    కాలయముండభిమన్యుడు
    బాలుడు భండనము నందు వైరులఁ గూల్చెన్!

    రిప్లయితొలగించండి





  13. అభిమన్యుని సందర్భంలో -

    కాలుండని భయపడగా
    నేలా ,మనమెల్లకూడి యీతని జంపన్
    జాలుదుమని యెదురుకొనన్
    బాలుడు భండనమునందు వైరుల గూల్చెన్.

    బాలచంద్రునిసందర్భముగా-

    ఆ లలన మేలమాడగ
    తాలిమిగోల్పోయి,రోషతాపమున జనె
    న్నాలమునకు రుద్రునివలె
    బాలుడు భండనమునందు వైరుల గూల్చెన్.



    రిప్లయితొలగించండి
  14. ఆలమున బాలచంద్రుడు
    ఫాలాక్షుని భంగి మెరిసె పల్నాటి దెసన్
    శూలము కరవాలము గొని
    బాలుడు భండనమునందు వైరుల గూల్చెన్

    రిప్లయితొలగించండి
  15. ఈ రోజుల్లో పిల్లలకు కంప్యూటర్లు, మొబైళ్లు, టాబ్లెట్లలో ఆటలు - అందునా - యుద్ధపుటాటలు, తుపాకులు బాక్సింగ్ వగైరాలు కాబట్టి:

    మేలును కీడెరుగకనున్
    గాలక్షేపమునుకోరి కైయంత్రమునన్
    దేలని "గేముల" దేలుచు
    బాలుడు భండనమునందు వైరుల గూల్చెన్

    [ ఆ ఆటలు ఎంతకీ తేలేవు - ఒక అంచె ఐతే మరో అంచె అది ఐతే మరోటి ]

    రిప్లయితొలగించండి
  16. కురుక్షేత్ర యుద్ధంలో కృష్ణుడు ధర్మరాజుతో పలికే పలుకులు :

    “ఆలము నాపుద మదె నెల
    బాలుడు ; భండనమునందు వైరుల గూల్చెన్
    చాల కిరీటియె ధర్మజ !
    కాలము దాటె రణమునకు కాంచగ నేడున్"

    రిప్లయితొలగించండి
  17. ఈనాటి సమస్యకు చక్కని పూరణలు చేసిన కవిమిత్రులు....
    పండిత నేమాని వారికి,
    లక్ష్మీదేవి గారికి,
    తోపెల్ల బాల సుబ్రహ్మణ్య శర్మ గారికి,
    మిస్సన్న గారికి,
    గన్నవరపు నరసింహ మూర్తి గారికి,
    సుబ్బారావు గారికి,
    సహదేవుడు గారికి,
    కమనీయం గారికి,
    నాగరాజు రవీందర్ గారికి,
    రామకృష్ణ గారికి,
    అభినందనలు, ధన్యవాదములు.
    *
    లక్ష్మీదేవి గారూ,
    ‘నీలపు కాయుడు’ కంటే ‘నీల శరీరుడు’ అంటే వినసొంపుగా ఉంటుందేమో!
    *
    తోపెల్ల వారూ,
    సవరించిన పూరణ బాగుంది. కానీ మొదటి పాదంలో గణదోషం... ‘వాలాయమ్ముగ’ అంటే సరి!
    *
    సహదేవుడు గారూ,
    ‘వేళ యిదే + అని’ అన్నప్పుడు యడాగమం వస్తుంది. ‘కౌరవ కూళలు’ అనడం సరి! ‘కూళుడు’ అనే రూపమూ ఉంది. దాని బహువచన రూపం ‘కూళురు’ అవుతుంది.
    *
    రామకృష్ణ గారూ,
    మొదటి పాదాన్ని ‘మేలును కీడుల నెఱుగక’ అంటే బాగుంటుందేమో?

    రిప్లయితొలగించండి
  18. తోపెల్ల బాల సుబ్రహ్మణ్య శర్మశనివారం, జనవరి 05, 2013 8:31:00 PM

    గురువులకు నమస్సులు. నిజమే.నగము మాత్రమే ఉన్నది౤ మీసవరణకు ధన్యవాదములు.

    రిప్లయితొలగించండి
  19. తోపెల్ల బాల సుబ్రహ్మణ్య శర్మశనివారం, జనవరి 05, 2013 8:33:00 PM

    వాలాయమ్ముగ యాగపు
    శాలల సురులాక్రమింప సంరక్షకుడై
    కోలన్ క్రోధజ్వాలన్
    బాలుడు భండనమునందు వైరుల గూల్చెన్

    రిప్లయితొలగించండి
  20. కాలుండై విల్లందుచు
    నాలస్యము చేయకుండ నసురాంతకుడై
    లీలన్ గిరిజాతనయుడు
    బాలుడు భండనమునందు వైరుల గూల్చెన్.

    రిప్లయితొలగించండి
  21. హరి వేంకట సత్యనారాయణ మూర్తి గారూ,
    మీ పూరణ బాగుంది. అభినందనలు.

    రిప్లయితొలగించండి
  22. శ్రీ గురుభ్యోనమః
    గురువుగారి సూచిత సవరణలతో నాపద్యం:
    వేళయిదేయని కౌరవ
    కూళలు వ్యూహంబుఁబన్న కూన కుపితుఁడై
    కాలయముండభిమన్యుఁడు
    బాలుడు భండనమునందు వైరుల గూల్చెన్!

    రిప్లయితొలగించండి
  23. మేలగు 'వీడియొ గేమ్సట'
    బాలకుడే యాడుచుండె పరి పరి విధముల్
    'కీ' లను పడి పడి నొక్కుచు
    బాలుఁడు భండనమునందు వైరులఁ గూల్చెన్.

    రిప్లయితొలగించండి
  24. గోలగ నోడెను రాహుల
    బాలుఁడు భండనమునందు;
    వైరులఁ గూల్చెన్
    మేలుగ నరేంద్ర మోడియె
    నాలుగు మూలల జయించి నాగం భొట్లూ!

    రిప్లయితొలగించండి
  25. మేలగు రీతిని కలలో
    వాలము ఝాడించి మేటి వైవిధ్యమునన్
    గోలగ రోమను సోనియ
    బాలుఁడు భండనమునందు వైరులఁ గూల్చెన్

    రిప్లయితొలగించండి