16, జనవరి 2013, బుధవారం

సమస్యాపూరణం - 939 (కనుమ నాటి పూజ)

కవిమిత్రులారా,
ఈరోజు పూరించవలసిన సమస్య ఇది ...
కనుమ నాటి  పూజ  కాటిఁ జేర్చె.
ఈ సమస్యను పంపిన పోచిరాజు సుబ్బారావు గారికి ధన్యవాదాలు.

23 కామెంట్‌లు:

  1. విశ్వనాథు గొల్చి వీధుల దిరిగెను
    మాట నిలుపు కొరకు మగువ నమ్మె
    విధికి జాలి లేదు విను హరిశ్చంద్రుని
    కనుమ, నాటి పూజ కాటిఁ జేర్చె.

    రిప్లయితొలగించండి
  2. దుష్ట శక్తుల బూజించు ధూర్తు డొకడు
    శక్తి నంపె నొకానొక సాధువుపయి
    హనుమ యా దుష్టుని వధించె నవ్విధమును
    కనుమ నాటి పూజ కాటి జేర్చె

    రిప్లయితొలగించండి
  3. శ్రీ నేమాని గారు సమస్య ఆటవెలది అయితే తేటగీతిలో పూరించినారు.

    రిప్లయితొలగించండి
  4. గోలి హనువచ్ఛాస్త్రి గారూ,
    శివుని పూజించినా విధివంచితుడై కాటికాపరి యైన హరిశ్చంద్రుని చూడండని మీరు చేసిన పూరణ బాగుంది. అభినందనలు.
    *
    పండిత నేమాని వారూ,
    దుష్టశక్తుల పూజ కాటికి జేర్చిందన్న మీ పూరణ చాలా బాగుంది. అభినందనలు.

    రిప్లయితొలగించండి
  5. అయ్యా శంకరయ్యగారూ నేమాని గారి ఛందస్సు గమనించారా? గమనించియే ఆ మాట చెప్పుచున్నారా?

    రిప్లయితొలగించండి
  6. అజ్ఞాత గారూ,
    ధన్యవాదాలు. మీ వ్యాఖ్య చూసేవరకు నేనూ గమనించలేదు...
    ఆ పద్యాన్ని ఇలా సవరించవచ్చేమో (నేమాని వారిని క్షమించమని కోరుతూ...)

    దుష్ట శక్తి గొల్చు ధూర్తు డొక్కం డొక్క
    శక్తి నంపె నొక్క సాధువుపయి
    హనుమ యా తులువను హతమార్చె నవ్విధి
    కనుమ నాటి పూజ కాటి జేర్చె

    రిప్లయితొలగించండి
  7. అయ్యా! కంది శంకరయ్య గారూ! శుభాశీస్సులు.
    మీ సవరణకి ఎంతో సంతోషము. అసలు ఈ నాటి సమస్యను చూడగనే నాకు పూరించాలి అనిపించ లేదు. మనస్సు ఒకవైపు పూరణ మరొక వైపుగా జరిగినది. అందుకే నా పూరణ కూడా దానికి తగినట్లు భిన్న చండస్సులతో వచ్చినది. స్వస్తి.

    రిప్లయితొలగించండి
  8. ఈమధ్య తేటవెలదులు , ఆటగీతులు అందరికీ అలవాటయినట్టున్నవి . కానిండు .

    రిప్లయితొలగించండి
  9. కనుమ నాటి పూజ కాటి జేర్చె ననుట
    సరియ కాదు వినుము సామి ! నిజము
    పూజ దినము దినము పూల తోడన జేయ
    పుణ్య మబ్బు సుమ్ము! పుణ్య పురుష !

    రిప్లయితొలగించండి
  10. పశుగణముల నెల్ల పాటించి చేయుము
    కనుమ నాటి పూజ; కాటిఁ జేర్చె
    డు తఱి మనల గాచెడు నివియె; నీ సాటి
    జీవములవి, చూడు చెలిమి తోడ.

    రిప్లయితొలగించండి
  11. పశుగణముల నెల్ల పాటించి చేయుము
    కనుమ నాటి పూజ; కాటిఁ జేర్చె
    డు తఱి మనల గాచెడు నిదియె- నీ సాటి
    జీవములవి, చూడు చెలిమి తోడ.

    రిప్లయితొలగించండి
  12. తోపెల్ల బాల సుబ్రహ్మణ్య శర్మబుధవారం, జనవరి 16, 2013 11:50:00 AM

    మునుపు గురువులనెడ పూజ్యులయందున
    కనగ మాతపితరులనన్అత్తమామలన్
    వినతి తోడ పూజ వెలయించి రెందరో
    కనుమ నాటి పూజ కాటి జేర్చె.
    (పూజ= సపర్య,సంసేవ, ఆరాధన)

    రిప్లయితొలగించండి
  13. తోపెల్ల బాల సుబ్రహ్మణ్య శర్మబుధవారం, జనవరి 16, 2013 11:59:00 AM

    క్షమించాలి.ద్వితీయపాదం తప్పింది. సవరించుచూ
    మునుపు గురువులనెడ పూజ్యులయందున
    కనగ మాతపితరులనగ మిగుల
    వినతి తోడ పూజ వెలయించి రెందరో
    కనుమ నాటి పూజ కాటి జేర్చె.
    (పూజ= సపర్య,సంసేవ, ఆరాధన)

    రిప్లయితొలగించండి
  14. మిన్నకుండె కుక్క కన్నము వేసెడు
    మ్రుచ్చు గనుచు తాను మొరగకుండ
    బడితపూజ నందె స్వామిచే గాడిద
    కనుమ ! నాటి పూజ కాటి జేర్చె

    రిప్లయితొలగించండి
  15. చేరి యొక్కచోట స్నేహితులిద్దరు
    బొంకుచుండి యొకడు పూజలన్న
    మరణతుల్యమనగ మరియొక డిట్లనె
    కనుమనాటి పూజ కాటి జేర్చె.

    నయము భయములేక నాస్తికు డొక్కండు
    పలుకుచుండె నిట్లు పాపమొదవు
    దైవపూజవలన తథ్యంబు ప్రజలార!
    కనుమనాటిపూజ కాటి జేర్చె

    రిప్లయితొలగించండి
  16. క్రొత్త బైకును గొని కోవెలలో పూజ
    జరిపి తిరిగి వచ్చు సమయమందు
    బస్సు వెనుకనుండి బలముగా డీకొట్టె
    గనుమ! నాటి పూజ కాటి జేర్చె.

    రిప్లయితొలగించండి
  17. శ్రీ నేమాని పండితారధ్యులకు
    గండూరి లక్ష్మీనారాయణ
    నమస్కారములు.
    శ్రీ తోపెల్ల సుబ్రమణ్యం గారి పూరణములో సవరణ ఇలా ఉంటె
    బాగుంటుందేమో.

    గురువులనెడ బదులు గురువుల యెడ
    మాతాపితరులనవల్సియుండును కాని గణభంగ మౌతుంది.
    తల్లి దండ్రులనగ సరిపోతుందని నా అభిప్రాయము .

    రిప్లయితొలగించండి
  18. శ్రీ గండూరి లక్ష్మీనారYఅణ గారూ! శుభాశీస్సులు.
    శ్రీ తోపెల్ల శర్మ గారి పద్యమునకు మీరు సూచించిన సవరణ (గురువుల యెడ) సరియైనదే. యడాగమమే లెస్స - నుగాగమము సరికాదు. స్వస్తి.

    రిప్లయితొలగించండి
  19. శ్రీ గండూరి లక్ష్మీనారయణ గారూ!
    మీరు సూచించిన 2వ సవరణ కూడా బాగుగనే యున్నది. తల్లిదండ్రులు అనే సమాసమే బాగుంటుంది. స్వస్తి.

    రిప్లయితొలగించండి
  20. తోపెల్ల బాల సుబ్రహ్మణ్య శర్మబుధవారం, జనవరి 16, 2013 9:17:00 PM

    పూజ్యశ్రీ నేమాని పండితులవారికి, శ్రీ గండూరి లక్ష్మీ నారాయణ మహోదయులకు ప్రణామములు. మాతాపితరులన్న ద్వంద్వసమాసమే సరియైనది.ప్రాథమిక దశావిద్యార్థిని.దయతో మీవంటి పెద్దల గుణదోష విమర్శ నాకు మిక్కిలి కావలెను. మీవంటివారు లభించుటయే ఒక అదృష్టము. చిత్ర పద్యముపై గూడ విమర్శ చేయ ప్రార్థనా పూర్వక ధన్యవాదములతో మీ సూచనలను గ్రహించి సవరించి రచించిన
    మునుపు గురువులయెడ పూజ్యులయందున
    కనగ తలిదండ్రులనగ మిగుల
    వినతి తోడ పూజ వెలయించి రెందరో
    కనుమ నాటి పూజ కాటి జేర్చె.

    రిప్లయితొలగించండి
  21. వేద వ్యాసు గొలిచె విశ్వనాధుని మెండు
    తిండి లేక దిరిగె మండి పడుచు
    నీర శించి యతడు భీరువై శపియింప
    కనుమ నాటి పూజ కాటి జేర్చె !

    రిప్లయితొలగించండి
  22. ఈనాటి సమస్యకు వైవిధ్యంగా చక్కని పూరణలు చెప్పివ కవిమిత్రులు....
    గోలి హనుమచ్ఛాస్త్రి గారికి,
    పండిత నేమాని గారికి,
    సుబ్బారావు గారికి,
    లక్ష్మీదేవి గారికి,
    తోపెల్ల బాల సుబ్రహ్మణ్య శర్మ గారికి,
    నాగరాజు రవీందర్ గారికి,
    హరి వేంకట సత్యనారాయణ మూర్తి గారికి,
    గండూరి లక్ష్మినారాయణ గారికి,
    రాజేశ్వరి అక్కయ్య గారికి,
    అభినందనలు, ధన్యవాదాలు.

    రిప్లయితొలగించండి