విన్నపము - ౧

విన్నపము
శ్రీమాన్ చిలుకమఱ్ఱి రామానుజాచార్యులు.
౧
 

శ్రీసఖా! విన్నప మ్మిది సేతు నీకు,
నాదు పేరాస గొన్గొని నవ్వఁబోకు!
*     *     *     *     *     *     *
ఎవఁడ? నెవ్వరివాఁడ? నే నెచటివాఁడ?
నిట కెటుల్ వచ్చి? తింకెటు లేగువాఁడఁ?
దెలియ దిసుమంత, సకలమ్ము తెలియునన్న
గర్వ మొక్కటియే గూడుగట్టుఁ గాని |
యేమి కర్మమో కటకటా! యింద్రియముల
చేతి కీల్బొమ్మనై భ్రమ జెందుచుంటి,
నొక్క నిముసము విశ్రాంతి చిక్కనీక
యేచి దుర్వార జవమున లేచు నవియె |
యేది యెటు లాగు, నే నటు పోదు, నింతె,
యివియె నా పోటుబంట్లు, నా కెపుడొ యేదొ
తోచినం జాలు, నివియెల్లఁ దోడుగాఁగ
సృష్టికళమీది కట్టె దండెత్తి వత్తు,
నిద్ది కూడును, గూడని దిద్ది యనెడు
జంకు కొం కనుమాట లేశమ్ము లేదు |
మదికి నచ్చినఁ జాలు, నేమాడ్కినైన
నాదియై తీరవలె నది యేది కాని ||
(రేపు మరికొంత....)