10, జూన్ 2011, శుక్రవారం

చమత్కార పద్యాలు - 71 (పాతరలో సూర్యుఁడు)

మోచెర్ల వెంకన్న కవి సమస్యా పూరణలు - 15
సమస్య -
"పాతరలో సూర్యుఁ డుదయపర్వత మెక్కెన్"
కం.
ఈతఱిఁ గాపులఁ బిలువుఁడి
రాతిరి ప్రొద్దెల్ల జాత రాయెను ధాన్యం
బాతురముగఁ బోయింతము
పాతరలో; సూర్యుఁ డుదయపర్వత మెక్కెన్.

(శ్రీ దీపాల పిచ్చయ్య శాస్త్రి గారి "చాటుపద్య రత్నాకరము" నుండి)
ఈ సమస్యకు పూరణలు పంపవలసిందిగా కవిమిత్రులను ఆహ్వానిస్తున్నాను.

10 వ్యాఖ్యలు:

  1. యాతన లేలా డబ్బుకు
    జాతరలో సరుకునమ్మ జాలవె? నేడే
    పోతము తెమ్మిటు తేగలు
    పాతరలో, సూర్యుఁ డుదయపర్వత మెక్కెన్

    ప్రత్యుత్తరంతొలగించు
  2. ప్రీతిగ ధ్యానము జేయుము
    ప్రాత: కాలమ్మునందు పరమేశ్వరునే !
    ఈ తరి నిద్దుర నీలో
    పాతర ! లోసూర్యుఁ డుదయపర్వత మెక్కెన్ !

    లోసుర్యుడు = రాత్రంతా ఎక్కడో లోపలున్న సూర్యుడు అని నా భావం.

    ప్రత్యుత్తరంతొలగించు
  3. తాతలు ధాన్యము వోతురు
    పాతరలో, సూర్యుడుదయపర్వతమెక్కెన్
    చూతమనుచుపాతర,నే
    రీతిగ రవి తాఁ గనంగ లేడే, లోనన్!

    పాతర = నేలమాళిగ ; అందులో చీకటి గా ఉంటుంది. సూర్యరశ్మి పడని చోటు. అందుకే సూర్యుడు పాతరలో ధాన్యమును చూద్దామని ప్రయత్నించీ, చూడలేకపోయాడని రాశాను.

    ప్రత్యుత్తరంతొలగించు
  4. రాతిరి పొలముకు కావలి
    యాతన తప్పుటకుధాన్య రాశుల నంతా
    మూతలు వేసెదమామన
    పాతరలో, సూర్యుడుదయపర్వతమెక్కెన్.

    ప్రత్యుత్తరంతొలగించు
  5. అందరికీ వందనములు !
    అందరి పూరణలూ అలరించు చున్నవి !

    01)
    ______________________________

    రాతిరి గోతిని తవ్వగ

    తాతల పాతర దొరికెను - తామరసముతో !

    భీతిలి సురభిని గప్పితి

    పాతరలో; సూర్యుఁ డుదయ - పర్వత మెక్కెన్ !
    ______________________________
    తామరసము = సురభి = బంగారము

    ప్రత్యుత్తరంతొలగించు
  6. మిస్సన్న గారూ,
    పాతరలోని తేగలు తెప్పించిన మీ పూరణ అద్భుతంగా ఉంది.

    గోలి హనుమచ్ఛాస్త్రి గారూ,
    నిద్దురను పాతిపెట్టుమన్న మీ పూరణ ఉత్తమంగా ఉంది.

    మందాకిని గారూ,
    సూర్యుణ్ణే పాతరలోకి తొంగిచూచేట్లు చేసిన మీ మొదటి పూరణ చాలా బాగుంది.
    రెండవ పూరణ బాగుంది. చిన్న సవరణలు (బ్రాకెట్లలో)
    "రాతిరి (చేనుకు) కావలి
    యాతన తప్పుటకుధాన్య రాశుల (నెల్లన్)
    ...... ‘పొలముకు’ అనికాక ‘పొలమునకు’ అనాలి కదా!

    ప్రత్యుత్తరంతొలగించు
  7. వసంత కిశోర్ గారూ,
    మీకు పాతర దొరికిందో, లేదో కాని మాకు మాత్రం మీ చక్కని పద్యాలు నిధి దొరికిందనడం అక్షరసత్యం. ధన్యవాదాలు.

    ప్రత్యుత్తరంతొలగించు
  8. గురువుగారూ,
    మీ సవరణలు (రెండు పూరణల్ల్లో) శిరోధార్యం. ధన్యవాదాలు.

    ప్రత్యుత్తరంతొలగించు