సరస్వతీ!
రచన : లక్ష్మీదేవి
శా. విద్యార్థుల్ నిను వేడుకొందు రిలలో వీణాధరీ! దీవనల్
సద్యోగంబుల నిమ్ము, శుద్ధచరితా! శాతోదరీ!
పావనీ!
పద్యం బన్నను నీరస మ్మనక పక్వంబౌ మహాశ్రద్ధతో
నుద్యోగమ్మున నేర్చుకొ మ్మనుచు నీ వొప్పింపగా రాగదే!
మ. కరమున్ బట్టుదు పుస్తకంబు, మనమున్ కైంకర్యమున్
జేతు, నీ
దరికిన్ బిల్వుము శారదా! చదువులన్ దానంబుగా నిచ్చెదో,
వరముల్ వేయు నవేల చాలు నదియే, వాణీ! సదాచారిణీ!
స్థిరమౌ దృష్టిని నన్ను గాచుకొనుమా శ్రీమంగళాకారిణీ!
పంచచామరము
సదా మదిన్ దలంతు నిన్ను శ్రద్ధతో, సరస్వతీ!
పదమ్ము లిట్లొసంగుమా! కృపామయీ, సరస్వతీ!
ముదమ్ముతోడఁ దీర్చుకొందు మ్రొక్కులన్, సరస్వతీ!
పదమ్ముఁ జేరుకొందు, మోక్ష ప్రాప్తికై, సరస్వతీ!
మత్తకోకిల
వీణఁ బట్టిన శారదాంబకు వేశుభమ్ములు పల్కుమా!
ప్రాణికోటికి విద్యనిచ్చెడు భారతీ జయ మందుమా!
పాణిఁ బట్టిన ధాతృపత్నికి, వందనమ్ములు పల్కుమా!
వాణి, పుస్తకపాణి, ముజ్జగవంద్యకున్ శుభమందుమా!
చక్కని పద్యాలు. అభినందనలు.
రిప్లయితొలగించండి‘ముజ్జగ వంద్యకు’ అనరాదు. “వాణి, పుస్తకపాణికిన్, జగవంద్యకున్..’ అనండి.
సరస్వతీ!యటంచు మీరు శారదన్ స్తుతించుచున్
రిప్లయితొలగించండిశిరస్సు వంచి మ్రొక్కినంత శీఘ్రమే వరమ్ములన్
మరింత వ్రాయగల్లు భావ మాధురీ మహత్తులన్
నిరంతరమ్ము నిచ్చు మీకు నేర్పులన్, సమున్నతిన్!
గురువుగారూ,
రిప్లయితొలగించండికృతజ్ఞురాలను. మీ సవరణ శిరోధార్యము.
నాకొక సందేహము.
ఖండకావ్యమనగా ఏదైనా ఒక విషయమును గొని ఉపోద్ఘాతము, ఘటన/ఇతివృత్తం, ఉపసంహారము ఉండాలని ఇన్నాళ్ళూ అనుకున్నాను. కానీ ఇక్కడ వచ్చిన ఖండకావ్యములను చూసి నేనూ ఇలా ప్రారంభించాను. కేవల వర్ణనలను, స్తుతులను ఖండకావ్యములనవచ్చునా? వివరింపవలసినది.
గురువుగారూ, ఈ పోస్టును స్పందనలతో సహా నా బ్లాగులో పెట్టుకున్నాను.
తొలగించండిఅయ్యా, అంతకన్న భాగ్యమా? ధన్యురాలనౌదును.
రిప్లయితొలగించండిఆదిగురువు మనిషికమ్మ|సరస్వతే|
రిప్లయితొలగించండివాక్కు నేర్పు తల్లి వాణిగాద?
భవిత బంచి పెట్టు భారతి బాధ్యతే
లక్ష్మి|దేవిరచన లక్ష ణంబె|
ధన్యవాదాలండి. అవును, ఇంత పలుకైనా ఇచ్చినదీ ఆ తల్లేనండి.
తొలగించండిలలిత పదముల లాస్య విలాస భరిత
రిప్లయితొలగించండిసతత వృత్యనుప్రాసల శారదాంబ
స్తుతిని జేయ “లక్ష్మీదేవి” సుగుణరాశి
భార తీదేవి యిచ్చుత భవ్యముగను.
సంతోషమండి. మీ ఆత్మీయమైన పలుకులకు ధన్యవాదాలు.
తొలగించండిశారదమ్మమీదచక్కనిగృతులను
రిప్లయితొలగించండిరచనజేసినట్టిరమ్యచరిత!
యింకనురచనలనునింపుగామరికొన్ని
యందజేయుమిపుడయభ్ధిపుత్రి!
తప్పకుండా, మీ ఆశీఃపూర్వకమైన పలుకులు సంతోషకారకాలండి.
తొలగించండిశారదాంబకు చక్కని చామరము వీచారు...బాగుంది.
రిప్లయితొలగించండిఎదురునడక కలిగిన పంచచామరము వ్రాయి చూద్దాం అన్నట్టు గా ఉండి భలే ఆసక్తిని కలిగిస్తుందండి నాకు. ధన్యవాదాలు.
తొలగించండికీ.శే. వడ్డూరి అచ్యుతరామ కవి (వారి కుమారుడు వడ్డూరి రామకృష్ణ )
రిప్లయితొలగించండిఅమ్మాశారద భారతీ సకల విద్యాస్వరూపిణి నిన్ను నే
సమ్మోదంబున భక్తితత్పరత నశ్రాంతంబు గీర్తింతు నా
కిమ్మోయమ్మ సమస్తవిద్యలును లక్ష్మీ కీర్తి ధృత్యున్నతుల్
నెమ్మిన్ నీపదపద్మ భక్తియును సాన్నిధ్యంబు వాగ్దేవతా
పద్యం అద్భుతంగా ఉంది. మొదటిపాదంలో గణదోషం ‘విద్యారూపిణీ నిన్ను...’ అనండి.
తొలగించండిఅందమైన పద్యమండి. అందరికీ ఆయమ్మే దిక్కు.
తొలగించండిఆనందామృత వర్షిణి త్రిభువను యజ్ఝాన సంహారిణీ
రిప్లయితొలగించండినానాలంకృత రూపిణీ భగవతీ నాదస్వరూపాననీ
వాణీవీణ కళావతంసి జననీ వాత్సల్యపూర్ణోదరీ
వీణాపాణి సునాదమోద వదనీ విజ్ఞాన భాండొదరీ
విరించిగారూ, ధారాశుద్ధితో చక్కటి శ్లోకాన్ని వ్రాసినందుకు అభినందనలు. చాలా బాగుంది.
తొలగించండిలక్ష్మీదేవి గారూ మీ పద్యాలు అమృతగుళికలు
రిప్లయితొలగించండిసంతోషమండి. ధన్యవాదాలు.
తొలగించండిలక్ష్మీదేవిగారు ...ఆ వాగ్దేవి కరుణా కటాక్షవీక్షణాలతో మీరు మరిన్ని మంచి ఖండికలు వ్రాయాలి...మత్తకోకిల పంచచామరం పద్యములు మరింతగా బాగున్నాయి..
రిప్లయితొలగించండిచాలా సంతోషము మీ శుభకర ఆకాంక్షలకు. ధన్యవాదాలండి.
తొలగించండిచిన్ని సవరణ.
రిప్లయితొలగించండికరమున్ బట్టుదు పుస్తకంబు, మనమున్ కైంకర్యమున్ జేతు, నీ
దరికిన్ బిల్వుము శారదా! చదువులన్ దానంబుగా నిచ్చినన్,
వరముల్ వేరుగనేల? చాలు నదియే, వాణీ! సదాచారిణీ!
స్థిరమౌ దృష్టిని నన్ను గాచుకొనుమా శ్రీమంగళాకారిణీ!
'చేతు' అన్న ప్రయోగం సాధువేనా అని అనుమానం. చేతు కోతు లిత్యాదులు సాధువులు కావనుకుంటాను.
తొలగించండికరమున్ బట్టుదు పుస్తకంబు, మనమున్ కైంకర్యమున్ గాగ అని సవరించదగునాండీ!
రిప్లయితొలగించండిసూచించినందుకు ధన్యవాదాలు. నిజమే కదా, చేతుకోతులు సాధువులు కాదు.