కవిమిత్రుల శుభాకాంక్షలు

కవిమిత్రుల నూతన సంవత్సర శుభాకాంక్షలు

శ్రీ చింతా రామకృష్ణారావు గారు

శ్రీ జ్ఞాన సంపన్నులైన, సచ్చిదానంద మూర్తులైన సాహితీ ప్రియ మిత్రులకు క్రీ.శ.2012 ఆంగ్ల వత్సరాది శుభాకాంక్షలు.
కాల గమనంలో ఆంగ్ల వత్సరం ఒక కొలమానంగా కలిగి, ప్రస్తుత సమాజంలో జీవిస్తున్న మనం శుభాల నాకాంక్షించడం అసందర్భం కాదని భావిస్తున్నాను.
శుభమస్తు!
******

శ్రీ లక్కాకుల వెంకట రాజారావు గారు

వచ్చె నవవత్సరమ్ము , కావచ్చు నిజము
కాలగణనమ్ము దీనిలో ఘనత యేమి ?
పేద శ్రీమంతు డగున ? దీపించి యెగసి
బడుగు బ్రతుకుల వెన్నెలల్ పరుగులిడున  ?

మనిషి స్వార్ధమున్ కొంతైన మాను కొనున ?
మనిషి మనిషిని దోచుట మాను కొనున ?
మనిషి దుర్మార్గ వర్తన మాను కొనున ?
మనిషి మనిషిని చంపుట మాను కొనున ?

నేతలు  వినీతులై   తలవ్రాత మారి
దేశ ప్రజలకు శాంతి సందేశ మిడున ?
చదువు పూర్తయి యుద్యోగ విధులు లేని
వారి బతుకులు కొలువుల చేరు వగున ?

కోత లేని ‘ పవరు ‘ సమ కూరునా ? జ
లమ్ము పారి  రైతన్న పొలాలు పండి
భారతావని కాకలి తీరునా  ?  ప్ర
భుత్వ పథకాల తీరు ప్రమోద మిడున ?

అగును కారణ మవినీతి యన్నిటికిని
ఓటరులు నీతి మంతులై ఓటు వేసి
నీతి మంతుల నేతల నెన్ను కొనిన
నాటి నవ వత్సరమ్ములు వేడు కగును 
*******

శ్రీ డా .యస్వీ రాఘవేంద్ర రావు గారు

తియ్యనౌ పల్కు మొల్కల నెయ్యమలర
సమత మమతయు ననెడి సస్యములు పండ
మీదు జీవిత కేదార వీధులందు
క్రొత్త వర్షమ్ము శుభములు కురియుగాక!
******