శంకరాభరణం: పద్యరచన

16, నవంబర్ 2014, ఆదివారం

పద్యరచన - 737

కవిమిత్రులారా,

పైచిత్రాన్ని పరిశీలించి తగిన పద్యము(ల)ను వ్రాయండి.

22 కామెంట్‌లు:

వసంత కిశోర్ చెప్పారు...: అందరికీ వందనములు !
అందరి పూరణలూ అలరింప నున్నవి !

పాత పుస్తకముల యంగడి :

01)
___________________________

మేలి పుస్తకము లిచట - వేలు దొరకు
సరసమైన ధరల కవి - చక్కగాను
కొన్ని యపురూప గ్రంథములు - గూడ దొరకు
దారి వెంబడి యంగడి - దడిమి జూడ
పేద విద్యార్థులకు పెద్ద - పెన్నిధిదియె !
___________________________; ఆదివారం, నవంబర్ 16, 2014 12:27:00 AM
చంద్రమౌళి సూర్యనారాయణ చెప్పారు...: అవ్వా నీవీ వయసున
నెవ్వరి యాశ్రయములేక నేకాకివిగా
నివ్వీధిలోననమ్ముట
యివ్విధముగ పత్రికలను నివ్వెరపరచున్; ఆదివారం, నవంబర్ 16, 2014 12:59:00 AM
subbarao చెప్పారు...: అవ్వ యచ్చట కూర్చుండి యమ్ము చుండె
పాత ,క్రొత్తవి యైనట్టి పలుర కముల
పుస్త కంబులు పేపర్లు పొలతు లార !
రండు కొనగను మానుచు దిండి యైన; ఆదివారం, నవంబర్ 16, 2014 1:05:00 AM
భళ్ళముడి శ్రీరామ శంకర ప్రసాద్ చెప్పారు...: బిచ్చమెత్త తప్పుయనుచు గుచ్చి జెప్ప
ముద్దు మోమున చిరునవ్వు ముసలి తల్లి
వీధి ప్రక్కపుస్తకముల విందు బెట్ట
కొలది నయిన దయను జూపి కొనగ రారె ?; ఆదివారం, నవంబర్ 16, 2014 7:10:00 AM
A.Satyanarayana Reddy చెప్పారు...: ముదిమి వయసున జానెడు పొట్టకొరకు
విక్రయించుచు పత్రికల్ వినయముగను
రెక్కలే తనకు సతము దిక్కటంచు
సలుపు చుండె జీవనమును సంతసముగ; ఆదివారం, నవంబర్ 16, 2014 7:47:00 AM
sailaja చెప్పారు...: హస్తములొణికొడి వయసున
పుస్తకముల నమ్ముచున్న ముదుసలి గనరే!
మస్తకమున తెలివి గలిగి
పస్తుల నుండక బ్రతికెడు బామ్మకు జేజే!!!; ఆదివారం, నవంబర్ 16, 2014 8:43:00 AM
కంది శంకరయ్య చెప్పారు...: వసంత కిశోర్ గారూ,
మీ పద్యం బాగున్నది. అభినందనలు.
కాని అది పాతపుస్తకముల అంగడి కాదు. తాజా దిన వార మాస పత్రికలు అమ్మే అంగడి.
****
చంద్రమౌళి సూర్యనారాయణ గారూ,
మీ పద్యం బాగున్నది. అభినందనలు.
****
పోచిరాజు సుబ్బారావు గారూ,
మీ పద్యం బాగున్నది. అభినందనలు.
****
అన్నపరెడ్డి సత్యనారాయణ గారూ,
మీ పద్యం బాగున్నది. అభినందనలు.
****
శైలజ గారూ,
మీ పద్యం బాగున్నది. అభినందనలు.
‘హస్తములు వణుకు వయసున...’ అనండి.; ఆదివారం, నవంబర్ 16, 2014 10:54:00 AM
లక్ష్మీదేవి / लक्ष्मीदेवी చెప్పారు...: అమ్ముచున్నవి పుస్తకమ్ములనవ్వ యొక్కతి, నవ్వులన్
కుమ్మరించుచు బోసినోటిని, కోటి తిప్పలు కూటికై
యమ్మనిట్టుల నీ వయస్సున నామెపుత్రుడు పంపెనో,
నమ్ము, కష్టముకాదటంచు తనంత తానయి వచ్చెనో?; ఆదివారం, నవంబర్ 16, 2014 12:23:00 PM
కంది శంకరయ్య చెప్పారు...: లక్ష్మీదేవి గారూ,
మీ పద్యం బాగున్నది. అభినందనలు.
`అమ్ముచున్నది' అని ఉండాలనుకుంటాను.; ఆదివారం, నవంబర్ 16, 2014 1:19:00 PM
శ్రీపతిశాస్త్రి చెప్పారు...: గురువుగారూ ధన్యవాదములు.

బోసి నవ్వులు నవ్వుచు పుస్తకముల
నమ్ము చున్నది ముదుసలి యవ్వ తాను
బ్రతుకు తెరువాయె బాధ్యతల్ భారమాయె
కాయ కష్టమ్మె వరమౌగ కలిమి కలుగె; ఆదివారం, నవంబర్ 16, 2014 2:43:00 PM
లక్ష్మీదేవి / लक्ष्मीदेवी చెప్పారు...: గురువుగారు, నిజమే.
పదాలను మార్చి కూర్చుకుంటునప్పుడు చివరకు మరొక్కసారి చదువుకోకపోవడం తీవ్రనిర్లక్ష్యానికి నిదర్శనమే.
మన్నించండి ఇకమీదట జాగ్రత్తగా ఉండడానికి ప్రయత్నిస్తాను.; ఆదివారం, నవంబర్ 16, 2014 4:04:00 PM
గండూరి లక్ష్మీనారాయణ చెప్పారు...: ఎనుబది యేండ్లు నిండినవి యెందుకు కష్టము ఫూటుపాతుపై
ననుదిన మిట్టులన్ జనుల కమ్ముచు నుంటివి వార్త పత్రికల్
తనయులు బుక్కెడన్నమును తల్లికి బెట్టని వారలుందురే !
జననము నిచ్చి రాగమున సాకిన త్యాగికి వృద్ద మాతకున్.; ఆదివారం, నవంబర్ 16, 2014 4:33:00 PM
కంది శంకరయ్య చెప్పారు...: శ్రీపతి శాస్త్రి గారూ,
మీ పద్యం బాగున్నది. అభినందనలు.
****
గండూరి లక్ష్మినారాయణ గారూ,
మీ పద్యం బాగున్నది. అభినందనలు.; ఆదివారం, నవంబర్ 16, 2014 4:51:00 PM
గుండా వేంకట సుబ్బ సహదేవుడు చెప్పారు...: ముడతలు పడినది కాయము
కుడుచుటగడపంగ నమ్మఁగూర్చిన పొత్తాల్
ముడతలు పడ్డది ఖాయము
బడయుము తగ్గింపు ధరకె,బ్రతికెద దయతో!; ఆదివారం, నవంబర్ 16, 2014 5:09:00 PM
బొడ్డు శంకర్ చెప్పారు...: పుత్రులు లేకనో మరియు పుత్రిక లెవ్వరు చెంతలేకనో
సత్రమునందుభుక్తికయి సాయము గోరక కష్టమొందుచున్
చిత్రముగా ప్రయత్నమును జేయుచు నున్నది కాలిబాటపై
పత్రిక లమ్ముచున్ ముసలి బామ్మ శ్రమించుచు పొట్టకూటికై; ఆదివారం, నవంబర్ 16, 2014 5:53:00 PM
ఆదిత్య చెప్పారు...: కొవ్వెక్కిన లోకంలో
బువ్వకు కరవై నరకపుముచ్చట్లమ్మే
అవ్వా! ఈ కాటిని నీ
నవ్వొక్కటి మిగిలె జగతి నడిపించంగా !; ఆదివారం, నవంబర్ 16, 2014 6:47:00 PM
గుండా వేంకట సుబ్బ సహదేవుడు చెప్పారు...: రెండవ పాదం టైపాటు సవరణతో :
ముడతలు పడినది కాయము
కుడుచుటగడవంగ నమ్మఁగూర్చిన పొత్తాల్
ముడతలు పడ్డది ఖాయము
బడయుము తగ్గింపు ధరకె, బ్రతికెద దయతో!; ఆదివారం, నవంబర్ 16, 2014 7:07:00 PM
కంది శంకరయ్య చెప్పారు...: గుండా వేంకట సుబ్బ సహదేవుడు గారూ,
మీ పద్యం బాగుంది. అభినందనలు.
****
బొడ్డు శంకరయ్య గారూ,
మీ పద్యం బాగున్నది. అభినందనలు.
****
ఆదిత్య గారూ,
మీ పద్యం బాగున్నది. అభినందనలు.; ఆదివారం, నవంబర్ 16, 2014 7:33:00 PM
krkr చెప్పారు...: నమ్మక మీ యమ్మ కమున
నమ్మెను తన రెక్క డొక్క నల c కువ వీడన్,
నమ్మక మీ నవ్వు ముఖము
సమ్మోహన మంది మనము సమ్మానమిడన్
కొరుప్రోలు రాధా కృష్ణ రావు; ఆదివారం, నవంబర్ 16, 2014 9:30:00 PM
గోలి హనుమచ్చాస్త్రి చెప్పారు...: అమ్మగ మెలిగిననీవే
అమ్మగ నీ పొత్తములనె యరుదెంచితివా !
ఇమ్ముగ నినుజూచుటకై
ఇమ్మహిలో నెవరులేర యిది దారుణమే !; ఆదివారం, నవంబర్ 16, 2014 9:50:00 PM
కంది శంకరయ్య చెప్పారు...: కొరుప్రోలు రాధాకృష్ణ రావు గారూ,
మీ పద్యం బాగున్నది. అభినందనలు.
****
గోలి హనుమచ్ఛాస్త్రి గారూ,
మీ పద్యం బాగున్నది. అభినందనలు.; ఆదివారం, నవంబర్ 16, 2014 10:18:00 PM
గోలి హనుమచ్చాస్త్రి చెప్పారు...: ఎవ్వారు నిన్ను జూడగ
నవ్వా దరిజేర్చలేద నాకటి కొరకై
అవ్వవ్వా ! పొత్తములను
నవ్వుచునే యమ్ముచున్న నారీ ! జే ! జే !; సోమవారం, నవంబర్ 17, 2014 8:31:00 AM

కామెంట్‌ను పోస్ట్ చేయండి