సమస్యాపూరణం - 756 (చిన్న సవరణ కలిగించె)

కవిమిత్రులారా...

ఈరోజు పూరించవలససిన సమస్య ఇది...

చిన్న సవరణ కలిగించె వన్నె లెన్నొ!

ఈ సమస్యను పంపిన ‘మనతెలుగు’ చంద్రశేఖర్ గారికి ధన్యవాదాలు.

కవిమిత్రుల పూరణలు

౧. గోలి హనుమచ్ఛాస్త్రి
    పద్య మొక్కటి చేర్చితి బ్లాగునందు
    దోసములనట చూచి ప్రయాస లేక
    శంకరార్యులు చేసిన సరస మైన
    చిన్న సవరణ కలిగించె వన్నె లెన్నొ!
*     *     *     *     *     *
౨. పండిత నేమాని
(1)
    రాయలు వచింప గగన ధునీ యటంచు
    పద్యమును విని సవరించె భావమెసగ
    నచట నాక ధునీ యంచు నా తెనాలి
    చిన్న సవరణ కలిగించె వన్నె లెన్నొ
(2)
    అద్య ధారా నిరాధార యనియు పిదప
    అజ్య ధారా సదాధార యంచు మార్చ
    భోజు డలరారె వాణియు మోదమొందె
    చిన్న సవరణ కలిగించె వన్నె లెన్నొ
*     *     *     *     *     *
౩. మన తెలుగు
(1)
    మట్టి ముద్దను మంచి బొమ్మలుగమలచు
    వాడె ఘనుడు శంకర గురువర్యులౌర
    “చిన్న సవరణ తెచ్చెను వన్నె లెన్నొ”
    అన్నమాటకు చేసిరి చిన్న మార్పు
    అదియె నేటి పూరణ పాదమయ్యెనిటుల
    “చిన్న సవరణ కలిగించె వన్నె లెన్నొ”
(2)

    మా కాలేజీ రోజుల్లో శ్రీదేవి ముక్కుకు ప్లాస్టిక్ సర్జరీ చేయించుకొన్నదని పుకారుండేది:
    చిత్రసీమ వార్తలతి విచిత్రమేమొ
    నక్కఁ దొక్కిన శ్రీదేవి ముక్కుఁ బట్టి
    చిదిమి ప్లాస్టికు సర్జను చేసినట్టి
    చిన్న సవరణ కలిగించె వన్నె లెన్నొ!
(3)
    “స్వల్పకార్యమిదం శేషం” అనే శ్రీ రామాయణ వాక్య(సుందరకాండలోనిది) స్ఫూర్తితో:
    అమ్మఁగనుగొని తిమ్మడు నెమ్మిగ నటు
    పోక మదినెంచె నొకపని పూర్తి జేయ
    గ్రక్కున వనవిధ్వంసము గరిపెద నను
    చిన్న సవరణ కలిగించె వన్నె లెన్నొ!
*     *     *     *     *    *
౪. హరి వేంకట సత్యనారాయణ మూర్తి
    శ్రద్ధ బూనుచు విద్యార్థి సంరచించు
    చిత్రమును జూచి కుంచెను చేతబూని
    గురువు రంగును సరిచేసె నరయ నతని
    చిన్న సవరణ కలిగించె వన్నెలెన్నొ.
*     *     *     *     *     *
౫. ఊకదంపుడు
    అలక లెట్టులో విడివడి యబ్జనయన
    నెన్నుదురుఁ నాసికాగ్రముఁ గన్నునొకటిఁ
    గప్ప, మలయమారుతవీచి కని సలిపిన
    చిన్న సవరణ కలిగించె వన్నె లెన్నొ.
*     *     *     *     *     *
౬. సుబ్బారావు
    శంకరా భరణమునకు జటిలమైన
    పద్య మొక్కటి పంపగ పదము మార్చి
    శంకరార్యులు బద్దెము సరియు జేయ
    చిన్న సవరణ కలిగించె వన్నె లెన్నొ.
*     *     *     *     *     *
౭. గుండా సహదేవుడు
    రంగు రంగుల మాధ్యమ హంగుఁ బెంచ
    కక్ష్య జేరి యుపగ్రహ లక్ష్య మంద
    దివికి భువికి సంధానపు తీగ తొలగ
    చిన్న సవరణ కలిగించె వెన్నె లెన్నొ!
*     *     *     *     *     *
౮. మిస్సన్న
    కస్తురి తిలకమ్ము కమ్రముగా దిద్దె
              గోపిక యొకరిత గోముగాను
    పట్టుదట్టిని కట్టె పడతి యొకర్తుక
              బంగరు మొలనూలు భామ కట్టె
    సందెట తాయెత్తు, సరిమువ్వ గజ్జెలు
              తల్లి యశోదమ్మ తాను బెట్టె
    ముద్దులొలుకు బాలమోహన కృష్ణుని
              ముద్దులాడగ వారు, ముగ్ధ రాధ
    నెమిలి యీకను గొనితెచ్చె నెమ్మితోడ
    గుచ్చె చక్కగా దానిని కురుల నడుమ
    ద్విగుణ మాయెను కన్నయ్య సొగసు లంత
    చిన్న సవరణ కలిగించె వన్నె లెన్నొ!
*     *     *     *     *     *
౧౦. లక్ష్మీదేవి
    ధర్మపత్నిని మితిమీఱి దాను వలచు
    తులసిదాసును మార్చిన దొక్కమాట.
    మోహము నశించె; నాతఁడు ముక్తిఁ బొందె.
    చిన్న సవరణ కలిగించె వన్నెలెన్నొ.