2, మే 2012, బుధవారం

సమస్యాపూరణం - 692 (బుద్ధిహీనులు మ్రొక్కిరి)

కవిమిత్రులారా,

ఈరోజు పూరించవలససిన సమస్య ఇది...

బుద్ధిహీనులు మ్రొక్కిరి మురహరునకు.

16 కామెంట్‌లు:

  1. చోరు డీతడు వస్త్రాపహారి యనుచు
    బహువిధంబుల కృష్ణుని బలుకు చుంద్రు
    బుద్ధిహీనులు, మ్రొక్కిరి మురహరునకు
    తన్మయత్వాన విజ్ఞులు ధన్యులగుచు.

    రిప్లయితొలగించండి
  2. నమ్మి సేవింపగావలె నెమ్మనమున
    నొక్క దేవునినేయంచు మిక్కుటమగు
    భక్తిగలవారు సుజనులు బళిర విషమ
    బుద్ధిహీనులు మ్రొక్కిరి మురహరునకు

    రిప్లయితొలగించండి
  3. లేని దానిని తానిచ్చు లెస్సగాను
    భక్తి గొలువగ తప్పక పరమ పురుషు
    డనుచు నైశ్వర్య హీనులు నచట మరియు
    బుద్ధిహీనులు మ్రొక్కిరి మురహరునకు.

    రిప్లయితొలగించండి
  4. స్వామి యనుచును దివ్యుడౌ సాధు వనుచు
    మంత్ర మనుచును భవ్యమౌ తంత్ర మనుచు
    నాది పురుషుని మరచుచు నరగు చపల
    బుద్ధిహీనులు మ్రొక్కిరి మురహరునకు.

    రిప్లయితొలగించండి
  5. వెన్న దొంగ గ ముద్రను వేయు చుండ్రు
    బుద్ది హీ నులు , మ్రొక్కిరి మురహరునకు
    భక్తి శ్రద్ధలు నెరపుచు పాండు రంగ !
    యనుచు కైదండ లిడుచును నార్తి తోడ .

    రిప్లయితొలగించండి
  6. ధనికులును పేదవారలు దండమిడిరి,
    స్త్రీలు, పురుషులు, వృద్ధులు, చిన్నవారు,
    బుద్ధిమంతుల గాంచిన పుణ్యఫలమొ
    బుద్ధిహీనులు మ్రొక్కిరి మురహరునకు.

    రిప్లయితొలగించండి
  7. పూర్వజన్మకర్మముచేత పుడమియందు
    దుష్టమగు కార్యములజేసి దురితులైరి
    కర్మనశియించగా కలిగె ధర్మమైన
    బుద్ధి, హీనులు మ్రొక్కిరి మురహరునకు.

    రిప్లయితొలగించండి
  8. బ్లాగుమిత్రులందరికీ శుభాభివందనములు. శ్రీ యజ్ఞేశ్వర కృపాకటాక్షము వలన పెద్దల ఆశీస్సులతో ఘనస్వస్తి వచనముల మధ్య మాకుమారుడి ఉపనయనము వేదవిధిగా జరిగినది. తిరిగి బ్లాగు మిత్రులతో సత్కాలక్షేపము పద్యరచన చేసేందుకు అవకాశం దొరికినందులకు ఆనందంగా ఉన్నది. ప్రస్తుతానికి మెదడుకు తుప్పు పట్టినది. త్వరలోనే యతి గణ ప్రాస భంగములు లేకుండా సమస్యాపూరణం చేయటానికి ప్రయత్నిస్తాను. మిత్రుల అభిమానానికి కృతజ్ఞతలు.

    రిప్లయితొలగించండి
  9. అందరికీ వందనములు !
    అందరి పూరణలూ అలరించు చున్నవి !

    01)
    ___________________________________


    బుద్ధి గలవారు మ్రొక్కిరి - మురహరునకు
    బుద్ధి హీనులు మ్రొక్కిరి - మురహరునకు
    బుద్ధి లేకున్న నేమాయె - యొద్దికయును
    భక్తి గలవారె మ్రొక్కిరి - ముక్తి కొరకు !

    ___________________________________

    రిప్లయితొలగించండి
  10. గురువు గారికి, గురువర్యులందరికి నమస్కారములు
    కొందరు అధికారమందున తాము జేసిన పాపపు పనులకు శిక్షలు పడకుండునట్లుజూడుమని మ్రొక్కుటనుజూచి,
    ------------
    వెలుగు నీడన జేయగ వెర్రిపనులు
    వెతలు జెంది నిలచిరిలే వెలుగులోన,
    శంకరగిరి మాన్యముజూడ సంశయమున
    బుద్ది హీనులు మ్రొక్కిరి మురహరునకు

    రిప్లయితొలగించండి
  11. సత్యనారాయణ మూర్తి గారూ,
    మంచి విరుపుతో చక్కని పూరణ చెప్పారు. అభినందనలు.
    *
    పండిత నేమాని వారూ,
    ప్రశస్తంగా ఉంది మీ పూరణ. అభినందనలు.
    *
    గోలి హనుమచ్ఛాస్త్రి గారూ,
    బాగుంది మీ పూరణ. అభినందనలు.
    *
    మిస్సన్న గారూ,
    మీ ‘చపల బుద్ధిహీనుల’ పూరణ బాగుంది. అభినందనలు.
    *
    సుబ్బారావు గారూ,
    చక్కని విరుపుతో మంచి పూరణ చెప్పారు. అభినందనలు.
    *
    లక్ష్మీదేవి గారూ,
    ‘యద్య దాచరతి శ్రేష్ఠః....’ సూక్తిని పూరణలో చక్కగా ఇమిడ్చారు. చక్కని పూరణ. అభినందనలు.
    *
    సంపత్ కుమార్ శాస్త్రి గారూ,
    వైవిధ్యమైన విరుపుతో ప్రశస్తమైన పూరణ చెప్పారు. అభినందనలు.
    *
    ‘మనతెలుగు’ చంద్రశేఖర్ గారూ,
    మీ కుమారుడి ఉపనయనం జరిగిన సందర్భంగా మీకు, మీ కుమారుడికి శుభాకాంక్షలు. మీ లోటు బ్లాగులో కనిపిస్తున్నది. పునస్స్వాగతం!
    *
    వసంత కిశోర్ గారూ,
    మురహరుడు సర్వ శరణ్యుడన్న మీ పూరణ చాలా బాగుంది. అభినందనలు.
    ‘ఏమాయె నొద్దికయును’ అందాం.
    *
    వరప్రసాద్ గారూ,
    బాగుంది మీ పూరణ. అభినందనలు.

    రిప్లయితొలగించండి
  12. గురువుగారు,
    ధన్యవాదములు.
    ఒక విన్నపము. మీవ్యాఖ్యలలో మీరు అలవోకగా ఎన్నో విషయాలు చెపుతూ ఉంటారు. వీలు కుదిరినపుడు మీరు ఏమైనా వ్రాస్తే చదవాలని ఆసక్తి కలుగుతున్నది.
    మీరు పలు కార్యక్రమములో వ్యస్తులై ఉన్నారని విన్నప్పటికీ, మీ మాటలు వినాలనే ఉత్సుకతతో అడుగుతున్నాను.
    మీ తర్వాతి తరము వాళ్ళు తెలుసుకోదగిన మంచిమాటలను మీరు అప్పుడప్పుడూ వ్యాసరూపంలో అందించగలిగితే మేము ధన్యులమౌతాము.
    నమస్కారములతో
    లక్ష్మీదేవి.

    రిప్లయితొలగించండి
  13. శంకరార్యా ! చక్కని సవరణలకు ధన్యవాదములు !

    రిప్లయితొలగించండి
  14. నిగమచయ విజ్ఞుల కగునె నెరయ నెఱుగ
    విశ్వరూపుని ,రక్షకు విదితముగను
    సన్నుతించుటె మేలని నన్ను బోలు
    బుధ్ధిహీనులు మ్రొక్కిరి ముర హరునకు

    రిప్లయితొలగించండి
  15. శ్రీపతిశాస్త్రిబుధవారం, మే 02, 2012 11:40:00 PM

    శ్రీగురుభ్యోనమ:

    మోక్షదాయక మము బ్రోచి ముక్తినొసగు
    మనుచు కోరిరి జ్ఞానులు హరిని గొలచి,
    సంపదలు సిరులు కలుగ చాలుననుచు
    బుద్ధిహీనులు మ్రొక్కిరి మురహరునకు

    రిప్లయితొలగించండి
  16. గన్నవరపు నరసింహ మూర్తి గారూ,
    వినయం భక్తుల ప్రధాన లక్షణం. ఆ వినయాన్ని ప్రదర్శించారు మీ పూరణలో. చక్కని పూరణ. అభినందనలు.
    *
    శ్రీపతి శాస్త్రి గారూ,
    సిరిసంపదలకోసం మ్రొక్కేవారు బుద్ధిహీనులన్న మీ పూరణ బాగుంది. అభినందనలు.

    రిప్లయితొలగించండి