16, సెప్టెంబర్ 2014, మంగళవారం

పద్యరచన - 678 (అగ్గిపెట్టె)

కవిమిత్రులారా,
ఈనాటి పద్యరచనకు అంశము...
“అగ్గిపెట్టె”

18 వ్యాఖ్యలు:

  1. భగ్గున వెలుగుచు పదముల
    బుగ్గిని చేయగలదొక్క పుల్లను గీయన్
    లగ్గగు జక్కగ వాడిన
    గగ్గకనీయగ్గిపెట్టె గావలసినదోయ్
    (పదములు =వస్తువులు,గగ్గు = సంకోచించు )

    ప్రత్యుత్తరంతొలగించు
  2. మానవుడి మేథ తో
    అగ్గి, పెట్టెలో దాక్కుంది
    చేయి లాగి పెట్టి రా గీస్తే
    మండి బుగ్గి అయ్యింది !!


    జిలేబి

    ప్రత్యుత్తరంతొలగించు
  3. చంద్రమౌళి సూర్యనారాయణ గారూ,
    మీ పద్యం బాగున్నది. అభినందనలు.
    ‘కావలసినదోయ్’ అన్నారు వ్యావహారికంలో. అక్కడ ‘కావలసినదే’ అనండి.
    *
    జిలేబీ గారూ,
    మీ భావానికి నా పద్యరూపం.

    మానవుని మేధతోడన్
    తా నొదిగెను పెట్టెలోనఁ దగ నగ్గియె, చే
    యానించి లాగి గీయం
    గా నదియె జ్వలించి బూదిగా మారునుగా.

    ప్రత్యుత్తరంతొలగించు
  4. అగ్గిపెట్టె జూడ నల్పమై యుండును
    అందులోని పుల్ల లటుల గావు
    అగ్గిపుల్ల గీచి యార్పక వేసినన్
    కొంప లంటుకొనును దుంపతెగును

    ప్రత్యుత్తరంతొలగించు
  5. నాగరాజు రవీందర్ గారూ,
    మీ పద్యం బాగున్నది. అభినందనలు.

    ప్రత్యుత్తరంతొలగించు
  6. సీత నశోక వనమున న
    చేతనఁ గని హనుమ రెచ్చె చిచ్చర పిడుగై!
    వాతలఁ బెట్టగ తోకకు
    భూతమ్మై 'యగ్గి పెట్టె' బూడిద జేయన్!

    ప్రత్యుత్తరంతొలగించు


  7. సిగరెట్టు ముట్టించి చిద్విలాసమ్ముగా
    ...........రింగుల పొగలూద హంగు నీవు !
    కటిక పేదకు పొయ్యి కట్టెను రాజేసి
    ...........వంటను జేయగా బలము నీవు !
    గడ్డివాముల, పాక లడ్డముగా గాల్చి
    ...........వైషమ్యముల బెంచ వాటమీవు !
    కాలిపోవగ తల, కట్టె పుల్లగ నుండి
    ...........చెవుల శుభ్రము జేయు చెలివి నీవు !
    పెద్ద నిద్దుర వోవ పిడికెడు బూదిగా
    .....మనిషిని మార్చెడు మహిమ నీవు!

    " నిప్పుతో చెలగాటము ముప్పు మనకు,
    నిప్పు కనిపెట్ట నరునకు ముప్పు వచ్చె "
    కన్ను కుట్టిన వారందు రెన్న నిట్లు
    నీకు నగ్గిపుల్లా! నుతుల్ నేనొనర్తు.

    తలను బాదు కొనుచు ధన ధనా పెట్టెకు
    తగుల బడుదు వీవు తాపమొదవ !
    స్వార్థ మెరుగ బోని జన్మ నెత్తితి వమ్మ!
    అగ్గిపుల్ల! జోత లమరజీవి!


    ప్రత్యుత్తరంతొలగించు
  8. గుండా వేంకట సుబ్బ సహదేవుడు గారూ,
    మీ పద్యం బాగున్నది. అభినందనలు.
    *
    మిస్సన్న గారూ,
    అద్భుతమైన పద్యాలతో ‘అగ్గిపెట్టె’ విశ్వరూపాన్ని సాక్షాత్కరింపజేశారు. చాలా బాగుంది. అభినందనలు.

    ప్రత్యుత్తరంతొలగించు
  9. అగ్గి పెట్టెను జూడగ నంద మొలుకు
    పుల్ల లుండును మందుతో పొదుపు గాను
    రాచి గీ చిన భగ్గున రగులు గొనుచు
    పచన మేదేని జేయును పవన యుతగ

    ప్రత్యుత్తరంతొలగించు
  10. మనుజు లందరి నేస్తమై మహిని వెలసి
    మంచి చెడ్డల నెంచక పంచు వెలుగు
    తాను కాలిన యజమాని తపన దీర్చు
    నగ్గి పుల్లల పెట్టెకు నంజలిడుదు!

    ప్రత్యుత్తరంతొలగించు
  11. గురువుగారూ ధన్యవాదాలు. ఈ పద్యాలు నేను సుమారు 3 నెలల క్రితమే వ్రాసినవి.

    ప్రత్యుత్తరంతొలగించు
  12. మడితోడ పూజారి గుడిలోననిచ్చెడు - హారతి వెలిగించునగ్గిపెట్టె
    గుడిసెలోనుండెడు గుడ్డిదీపంబుల - నంటించ గావలెనగ్గిపెట్టె
    పొయ్యిల వెలిగించ పూబోడులకునెల్ల - నవసర మెప్పుడీ యగ్గిపెట్టె
    నిప్పునంటించుకొని చనిపోవ తలచ -నాత్మహత్యకుగూడనగ్గిపెట్టె
    హోమమందునైన ధూమపానముకైన
    కాటిలోనగాలు కట్టెకైన
    మంచిచెడులయందు మానవులకెపుడు
    నండనుండునుగద యగ్గిపెట్టె

    ప్రత్యుత్తరంతొలగించు
  13. సుబ్బారావు గారూ,
    మీ పద్యం బాగున్నది. అభినందనలు.
    *
    శైలజ గారూ,
    మీ పద్యం బాగుంది. అభినందనలు.
    *
    చంద్రమౌళి సూర్యనారాయణ గారూ,
    మీ సీసపద్యం బాగుంది. అభినందనలు.
    ‘ధూమపానమునకు’ అనండి.

    ప్రత్యుత్తరంతొలగించు

  14. వెగించగ పొయ్యిని సతి
    వెలిగించగ చుట్ట తాత వెలుతురు కొరకై
    వెలిగించగ లాంతర్లను
    వెలిగించగ హారతినిది వెలిగిడు పెట్టౌ.

    ప్రత్యుత్తరంతొలగించు
  15. గోలి హనుమచ్ఛాస్త్రి గారూ,
    మీ పద్యం బాగుంది. అభినందనలు.

    ప్రత్యుత్తరంతొలగించు

  16. మిస్సన్న గారూ ! సూర్యనారాయణ గారూ 1 అగ్గిపెట్టెను బాగా వెగించారండీ...

    ప్రత్యుత్తరంతొలగించు
  17. గోలి హనుమచ్ఛాస్త్రి గారూ ధన్యవాదములు .

    ప్రత్యుత్తరంతొలగించు