నిర్వచన భారత గర్భ రామాయణము – 78

రావిపాటి లక్ష్మినారాయణ

రామాయణము-

సీ.      (అన సుయోధనఖలుఁ డలుకఁ దాడితభోగి

వలెను బుస్సని, వెస బంట్ల నంపి)

నిలు వంటయింటికుందెలు వయి తని, తోక

కగ్ని నంటింపించి, యనిపెఁ ద్రిప్ప;

స్వసఖజు వహ్ని గాల్పకయుండె, లంకఁ బా

వని గాల్చె, మంటార్పుకొనె, దనుజులు

(పట్టఁబోవఁగ హరి వారి వారించి, గ

ర్జనముచేఁ దనరి, విరాడ్గతిఁ జనె)

గీ.      నంగదాదుల వద్దకు నబ్ధిదాటి,

వారిఁ గలిసి యరిగిఁ రామభద్రు కడకు

గంటి సీత మన్మాత లంక నని పలికి

పూస గ్రుచ్చినగతి సర్వము న్నుడివెను. (౯౩)

భారతము-

ఆ.      అన సుయోధనఖలుఁ డలుకఁ దాడితభోగి

వలెను బుస్సని, వెస బంట్ల నంపి

పట్టఁబోవఁగ హరి వారి వారించి, గ

ర్జనముచేఁ దనరి విరాడ్గతిఁ, జనె. (౯౩)

టీక- సుయోధనఖలుఁడు = (రా) రావణుఁడు, (భా) దుర్యోధనుఁడు; హరి = (రా) హనుమంతుఁడు, (భా) కృష్ణుఁడు; విరాడ్గతి = (రా) పక్షివలెను, (భా) విరాడ్రూపముచే, తాడిత = కొట్టబడిన; భోగి = పాము.