నిర్వచన భారత గర్భ రామాయణము – 83

రావిపాటి లక్ష్మినారాయణ

రామాయణము-

సీ.      రవిజుండు కపులతోఁ జెవియొగ్గి వినుఁడు నా

ది శిలాక్షరము విరోధీబలమునకు

వెన్నుఁజూపకుడు చూపిన యమాలయమున

కతిథు లయ్యెద రనె; ననఁగ వారు

కాసువీసముగారు క్రవ్యాదులు, చిదిమి

పెట్టమె చిచ్చఱ పిడుగులమయి

రాయి గ్రుద్దెదము వారలతలలనుఁ దన్నె

దమని గంతులిడి రుత్సాహమునను;

గీ.       (ఘనగతిని దక్షిణోత్తరవనధు లలుక

గొనుచుఁ బెనగుభాతినిఁ గడుగొబ్బున నిరు

మొనలు గవిసి చేసెను యుద్ధమునుఁ బదహతు

ల క్షితియును వడఁకన్,) బో రలఘువు నయ్యె. (౯౮)

భారతము-

కం.     ఘనగతిని దక్షిణోత్తర

వనధు లలుక గొనుచుఁ బెనగుభాతినిఁ గడుగొ

బ్బున నిరుమొనలు గవిసి చే

సెను యుద్ధమునుఁ బదహతుల క్షితియును వడఁకన్. (౯౮)

టీక- ఉత్సాహమునను = వీరరసముతో; క్రవ్యాదులు = రాక్షసులు; గొబ్బున = త్వరగా; మొనలు = సైన్యములు.